Ռուս խաղաղապահները մոտ 40 լիտր արյուն են հանձնել Արցախի հիվանդների համար

Ռուսական խաղաղապահ զորախմբի զինծառայողները մոտ 40 լիտր արյուն են հանձնել այն քաղաքացիների համար, որոնք բուժվում են Արցախի հիվանդանոցներում և ապրում հեռավոր շրջաններում՝ սահմանազատման գծի մոտ: Այդ մասին հաղորդագրություն է հրապարակված ՌԴ ՊՆ պաշտոնական կայքէջում:

Հաղորդագրության մեջ ասվում է, որ զինծառայողների արյան նվիրատվությունը տեղի է ունեցել կամավոր հիմունքներով` ի պատասխան տեղական իշխանությունների՝ Ռուսաստանի խաղաղապահ զորախմբի մարդասիրական արձագանքման կենտրոնին ուղղված օգնության դիմումի:

Ըստ ՌԴ ՊՆ-ի, մոտ 100 ռուս զինծառայող արձագանքել են կոչին և կամավոր հանձնել իրենց արյունը: Արյան նմուշառումն իրականացրել են խաղաղապահ զորախմբի հատուկ նշանակության բժշկական ստորաբաժանման մասնագետները Ստեփանակերտի արյան փոխներարկման բաժանմունքում:

«Նվիրատուի արյունը վերցնելուց հետո այն գալիս է լաբորատորիա` վարակիչ լինելու հավանականության և արյան միջոցով փոխանցվող վարակների հետազոտության համար, որպեսզի բացառվի նման դեպքերը: Անհրաժեշտ է հեպատիտի, ՁԻԱՀ-ի, մալարիայի առկայության ստուգումը՝ բացառելու մի շարք վարակները և ստուգելով դոնորի Rh-ը: Դրանց արդյունքում անմիջապես եզրակացություն է արվում ստացողի արյան հետ համատեղելիության վերաբերյալ»,- ասել է արյան փոխներարկման բաժնի պետ Գայանե Ավանեսյանը:

Ռուսական խաղաղապահ զորախմբի ներկայացուցիչ Մաքսիմ Պուգաչովը հայտնել է, որ մինչ արյան հանձնումը չափվում է յուրաքանչյուր զինծառայողի արյան ճնշումը, անցկացվում բողոքների հետազոտություն և լրացվում են անհրաժեշտ հարցաթերթիկները:

«Արյան հանձնման ընթացակարգի ավարտին յուրաքանչյուր զինծառայողի տրվել է լրացուցիչ սննդի չափաբաժին` շոկոլադի, հյութի և բլիթների տեսքով: Բացի այդ, արյան դոնոր բոլոր զինվորականներին կտրամադրվի լրացուցիչ հանգստյան օր»,- նշվում է հաղորդագրությունում։