Էրդողանը հայտարարել է՝ Թուրքիան մտադիր չէ վերածվել փախստականների եվրոպական «պահեստի»

Թուրքիան մտադիր չէ Եվրոպայի համար միգրանտների համար «պահեստի» դեր կատարել, Անկարան նման պարտականություն, պատասխանատվություն կամ պարտավորություններ չունի: Այս մասին, «Անադոլու» գործակալության հաղորդմամբ, հայտարարել է Թուրքիայի նախագահ Ռեջեփ Թայիփ Էրդողանը

Էրդողանն անդրադարձել է նաև Աֆղանստանում տիրող իրավիճակին: Նրա խոսքով, Թուրքիան, անհրաժեշտության դեպքում, կշփվի Թալիբան շարժման ստեղծած կառավարության հետ, քանի որ Անկարայի հիմնական նպատակը Աֆղանստանի կայունությունն ու անվտանգությունն է:

Էրդողանը նշել է, որ Աֆղանստանում բնակվում է մինչև 5 հազար Թուրքիայի քաղաքացի: Նրա խոսքով, նրանցից մոտ 500-ը, օտարերկրյա 83 քաղաքացիների հետ միասին, իրենց խնդրանքով տեղափոխվել են Թուրքիա:

«Մենք արագորեն կտեղափոխենք մեր քաղաքացիներին իրենց հայրենիք, ովքեր դեռ սպասում են վերադառնալուն, նրանց թիվը 300-ից պակաս է», - ավելացրել է նա: