ԱԺ-ում լրագրողները բողոքի ակցիա իրականացրեցին

Խորհրդարանի աշխատանքները լուսաբանող լրագրողներն այսօր ի նշան բողոքի ակցիա իրականացրեցին։ Մինչ Նիկոլ Փաշինյանն ԱԺ դահլիճում ներկայացնում էր կառավարության ծրագիրը, լրագրողներն իրենց համար նախատեսված օթյակում բողոքի ձայն բարձրացեցին ԱԺ տարածքում լրագրողների աշխատանքի սահմանափակումների վերաբերյալ։

Ակցիայի ընթացքում արագ օթյակ մտան պետական ծառայության  աշխատակիցները՝ փորձելով խոչընդոտել լրագրողների ակցիան։

Ու քանի որ օթյակից չէր լսվում լրագրողների ձայնը, նախկին լրագրող, «Պատիվ ունեմ» խմբակցության պատգամավոր Թագուհի Թովմասյանը բարձրացել է նրանց մոտ։

«Եղա նրանց մոտ, արձանագրեցի պահանջները՝ հանդիպում Նիկոլ Փաշինյանի հետ՝ ԱԺ տեղաշարժի սահմանափակումները վերացնելու օրակարգով: ՊՊԾ-ին հորդորում եմ շարունակել պահպանել զգոնությունը և չխոչընդոտել լրագրողների աշխատանքին, նաև ակցիային»,-գրել է պատգամավորը ֆեյսբուքյան իր էջում։

Լուսանկարներն արել են ընդդիմադիր պատգամավորներն ու հրապարակել ֆեյսբուքյան իրենց էջերում։