Պելեն կրկին տեղափոխվել է վերակենդանացման բաժանմունք

Բրազիլիայի ֆուտբոլի ազգային հավաքականի նախկին ֆուտբոլիստ Պելեն կրկին տեղափոխվել է վերակենդանացման բաժանմունք: Լուրը հայտնում է ESPN Brasil-ը:

Ֆուտբոլիստը կլինիկա էր ընդունվել օգոստոսի 30-ին, իսկ սեպտեմբերի 6-ին նրան վիրահատել էին՝ հեռացնելով հաստ աղիքի ուռուցքը: Սեպտեմբերի 13-ին Պելեն տեղափոխվել է սովորական հիվանդասենյակ, բայց մեկ օր անց նա կրկին վերակենդանացման բաժանմունքում էր:

Հայտնում են, որ Պելեն ունեցել է ռեֆլյուքս:

Ֆուտբոլի միջազգային ֆեդերացիայի (ՖԻՖԱ) ֆուտբոլային հանձնաժողովի գնահատմամբ՝ Պելեն 20-րդ դարի լավագույն խաղացողն է: Իր կարիերայի ընթացքում բրազիլացին 1363 խաղում դարձել է 1289 գոլի հեղինակ:

Բրազիլիայի հավաքականի կազմում նա դարձել է աշխարհի եռակի չեմպիոն: Հանդես գալով «Սանթոսում»՝ Պելեն վեց անգամ դարձել է Բրազիլիայի չեմպիոն: