Պերմի իշխանությունները «դպրոցում նամազի» դեպքը բացատրել են «թուրքական» դիրքով մարզանք անելու հանգամանքով

Պերմի թիվ123 դպրոցի աշակերտները ֆիզկուլտուրայի դասին սովորել են «թուրքական» դիրքով նստել, բայց նամազ չեն կարդացել: Այդ մասին «Գազետա ռու»-ին հայտնել են քաղաքի կրթության վարչությունից՝ մեկնաբանելով ֆիզկուլտուրայի ուսուցչի գործողությունները, որը, ինչպես աշակերտների ծնողներն են հայտնել, երեխաներին հորդորել է «աղոթել Ալլահին»:

«Ծնողների տեղեկությունները սոցիալական ցանցերում հայտնվելուց անմիջապես հետո քաղաքի կրթության վարչության մասնագետները կապ են հաստատել թիվ 123 դպրոցի տնօրենի հետ: Նրա խոսքերով՝ իրավիճակն այնպես է եղել, որ առաջին դասարանի աշակերտները ֆիզկուլտուրայի դասին կատարել են տարբեր վարժություններ, այդ թվում՝ սովորել են «թուրքական» դիրքով նստել: Այստեղ կրոնական ենթատեքստ չկար: Ինչպես նշել է դպրոցի տնօրենը, ֆիզկուլտուրայի ուսուցիչը փորձառու և գրագետ մասնագետ է, ունի համապատասխան որակավորում: Նախկինում նրա աշխատանքի վերաբերյալ բողոքներ չեն եղել»,- ասել են մամուլի ծառայությունից:

Այնտեղից նաև հայտնել են, որ դպրոցի տնօրենը հանդիպում է նշանակել աշակերտների ծնողների հետ՝ իրավիճակը հասկանալու համար:

«Պերմի կրթության վարչությունը դպրոցի ղեկավարին մատնանշել է աշխատողի մասնագիտական էթիկայի չափանիշներին համապատասխանության վերաբերյալ ներքին ծառայողական քննություն անցկացնելու անհրաժեշտության մասին: Այսօր դպրոցի տնօրենը պայմանավորել է հանդիպել ծնողների հետ՝ կատարվածը պարզաբանելու համար»,- պարզաբանել են բաժնից:

Ավելի վաղ սոցիալական ցանցում հայտնվել էր մի տեսանյութ, որում Պերմի թիվ 123 դպրոցի աշակերտն ասում էր, որ ֆիզկուլտուրայի դասին նրանք ստիպված են եղել աղոթել Ալլահին: Տղան ձեռքերի ափերը վեր բարձրացրած, աղոթքի բնորոշ կեցվածքներ է ցուցադրել: Նա նշել է, որ ֆիզկուլտուրայի ուսուցիչն այսպես է «մարզում» առաջին դասարանցիներին: