Ֆրանսիայի իշխանությունները ցանկանում են մինչև ամառ երկարաձգել սանիտարական անցաթղթերի օգտագործումը

Ֆրանսիայի կառավարությունը խորհրդարանին կառաջարկի մինչև ամառ պահպանել սանիտարական անցաթղթերի օգտագործումը որպես կորոնավիրուսի համաճարակի դեմ պայքարի միջոց: ՏԱՍՍ-ի փոխանցմամբ՝ այդ մասին չորեքշաբթի օրը նախարարների խորհրդի նիստից հետո հայտարարել է Ֆրանսիայի կառավարության մշտական ներկայացուցիչ Գաբրիել Ատալը:

«Մենք ցանկանում ենք խորհրդարանին առաջարկել թողնել այդ միջոցների օգտագործումը ևս մի քանի ամիս՝ մինչև ամառ»,-ասել է նա: Ատալը հիշրել է, որ միջոցներն իշխանությունների կողմից ներդրվել են ֆրանսիացիներին պաշտպանելու համար: Նա մատնանշել է, որ երկրում սանիտարական վիճակը բարելավվում է նաև պատվաստումների և սանիտարական անցաթղթերի օգտագործման շնորհիվ:

«Մենք լավատես լինելու պատճառներ ունենք, բայց պետք է զգույշ լինել»,-շեշտել է նա:

Ատալը պարզաբանել է, որ խոսքը նման հնարավորության պահպանման մասին է, այլ ոչ թե պարտադիր օգտագործման:

Ֆրանսիայում սանիտարական անցաթղթերը տրվում են ամբողջական պատվաստման վկայականի, ՊՇՌ թեստի արդյունքի կամ հիվանդությունից հետո իմունային  բավարար մակարդակը հաստատող վկայականի հիման վրա: Կորոնավիրուսի համաճարակի դեմ պայքարի միջոցառումների մասին գործող օրենքը ենթադրում է սանիտարական թույլտվությունների կիրառում միայն մինչև նոյեմբերի 15-ը, որից հետո նոր օրենք է պահանջվում, եթե իշխանությունները ցանկանում են երկարաձգել փաստաթղթի վավերականությունը:

Իշխանությունների վերջին տվյալներով՝ Ֆրանսիայում համաճարակի սկզբից ի վեր հայտնաբերվել է վարակի ավելի քան 7 միլիոն դեպք, համաճարակի զոհ է դարձել մոտ 116 հազար մարդ: Ավելի քան 50 միլիոն մարդ ստացել է կորոնավիրուսի պատվաստանյութի առնվազն մեկ դեղաչափը: