Նոյեմբերի 23-ից հետո Արցախում ռուս սակրավորները հայտնաբերել և ոչնչացրել են 26,033 պայթուցիկ առարկա

Արցախի Հանրապետության շուրջ՝ սահմանազատման գծի երկայնքով ականազերծման աշխատանքները շարունակվում են: Այն իրականացվում է տեղի շրջանային իշխանությունների կողմից ռուսական խաղաղապահ զորախմբի հրամանատարությանը ներկայացված դիմումների հիման վրա: Ականազերծման աշխատանքների մասին հաղորդագրություն է հրապարակված ՌԴ ՊՆ կայքէջում:

Հաղորդագրության մեջ ասվում է, որ ականազերծման առաջադրանքներ իրականացնելու համար զինծառայողներն օգտագործում են OVR-2 պաշտպանական համակցված սակրավորական հանդերձանք, IMP-S2 ականների դետեկտորներ և INVU-3M «Կորշուն» դյուրակիր հեռահար պայթուցիկ առարկաներ որոնող սարքը, որոնք ռադիոէլեկտրոնային բաղադրիչներով և սխեմաների  միջոցով են հայտնաբերում չպայթած զինամթերքները:

Ըստ ՌԴ ՊՆ-ի՝ պաշտպանության և ականազերծման ժամանակակից միջոցների հետ մեկտեղ, զինծառայողներն ակտիվորեն օգտագործում են ականներ որոնող շներին՝ գերմանական հովվաշների ցեղատեսակի առանձնյակներին, որոնք ունակ են աշխատել տաք եղանակին՝ մինչև 35 աստիճան օդի ջերմաստիճանի պայմաններում:

ՌԴ ՊՆ-ն հայտնում է, որ հատուկ վարժեցված շները մետաղի կույտում և շինությունների փլատակների տակ տարբերակում են պայթուցիկ նյութերը:

Հաղորդագրության մեջ ասվում է, որ խաղաղապահները մեկ օրվա ընթացքում 1 հեկտար տարածք են մաքրել չպայթած զինամթերքից և պայթուցիկ առարկաներից՝ հայտնաբերելով և վնասազերծելով մեկ պայթուցիկ օբյեկտ:

Ընդհանուր առմամբ, 2020 թվականի նոյեմբերի 23-ից հետո ռուս սակրավորները ստուգել են 1,937 շենք, մաքրել ավելի քան 683 կմ ճանապարհ և ավելի քան 2300 հա տարածք՝ հայտնաբերելով և ոչնչացնելով 26,033 պայթուցիկ առարկա: