Մեր իշխանությունների օրոք Սուրբ Ղազանչեցոցը՝ Ղազանչի չէր, Շուշին՝ Շուշա չէր. Հակ Մամիջանյան

«Մեր իշխանությունների օրոք Սուրբ Ղազանչեցոցը՝ Ղազանչի չէր, Շուշին՝ Շուշա չէր և մեր հայրենիքում էր՝ մեր զինվորների պաշտպանության տակ»,-այսօր ԱԺ-ում իր ելույթում հայտարարեց «Պատիվ ունեմ» խմբակցության պատգամավոր Հայկ Մամիջանյանը:

Նա նկատեց, որ նախկին իշխանությունների ժամանակ քաղաքացիները Սյունիքով անվտանգ են երթևեկել, իսկ Ալիևը բողոքել է, որ փակ դռների հետևում իրեն ստիպել են ճանաչել Արցախի անկախությունը:

Ըստ պատգամավորի՝ նախկինում երկրի, խորհրդարանի և գործադիրի ղեկավարներն անարգել այցելում էին Արցախ, այլ ոչ թե վախենում էին ինչ-որ մեկից՝ որ հանկարծ չջղայնանա, որ Արցախի տոնի օրն իրենք գնացել են Ստեփանակերտ:

Շեշտելով, որ իշխանական պատգամավորները հիշել էին Սերժ Սարգսյանի այն հայտարարությունը, թե Աղդամը մեր հայրենիքը չէ՝ Մամիջանյանը հիշեցրեց,  որ իշխանական պատգամավորներն այսօր հայտարարում են, որ իրենք չեն պնդում, որ Շուշին և Հադրութը պետք է հետ բերեն և ՄԱԿ-ում խոսեն այդ քաղաքների օկուպացիայի մասին:

«Պատիվ ունեմ» խմբակցության պատգամավորի խոսքով՝ նրանք, ովքեր գոռում էին Աղդամի մասին, այսօր լուռ են հայրենիքի կորստի մասին խոսելիս:

«Մենք ժամանակին օրենք ենք ընդունել, որ ՀՀ վարչապետն ընդունում է որոշումներ՝ ի շահ ՀՀ-ի և որոշ դեպքերում ոչ ադեկվատ դրսևորումներ չի ունենում, այդ օրենքներն էլ պահպանեք»,-իշխանություններին հորդորեց Հայկ Մամիջանյանը։