Յուրի, Ալբերտ, Աղասի...Ապրեցին, զոհվեցին ու ամփոփվեցին կողք կողքի

Յուրի Օհանյան, Ալբերտ Հովսեփյան, Աղասի Բեջանյան, Նարեկ Քարտաշյան, Հովհաննես Պորտուգալյան ու ևս 20 անուն։ Կամավորները զոհվեցին անցած տարի հենց այս օրը՝ հոկտեմբերի 14-ին, Վարանդայում։  Բոլորը զոհվեցին նույն դիրքում։

Յուրի Օհանյանը, Ալբերտ Հովսեփյանը և Աղասի Բեջանյանը միասին են կամավոր մեկնել առաջնագիծ, 2020 թվականի հոկտեմբերի 5-ին։  Ալբերտը Յուրիի հորաքրոջ տղան է, իսկ Աղասին՝ մանկության ընկերը։

Այսօր էլ նրանք կողք-կողքի են՝ Եռաբլուրում, ինչպես մանկության, պատանեկության ու երիտասարդության օրերին, մարտի դաշտում։

Տղաներից վերջին զանգը ստացվել է հոկտեմբերի 14-ին,այդ իսկ պատճառով էլ ծնողները ենթադրում են, որ հենց այդ օրն են զոհվել նրանք։

Շուրջ 20 կամավորներ՝Երևան քաղաքի Արաբկիրի, Շենգավիթի և Նոր Նորքի վարչական շրջաններից... նրանցից շատերի ծնողներն էլ տեսել են իրենց զավակների մարմինները միայն ադրբեջանական կայքերում։

Կամավորների խումբը հերոսական պայքար է մղել Վարանդայում հոկտեմբերի 5ից, խոցել և ոչնչացրել են մեծ քանակությամբ թշնամական կենդանի ուժ...Նրանցից մեկի՝ Սամվել Կնյազյանի ճակատագիրը դեռևս անհայտ է...

Այսօր էլ հերոսների ընտանիքները, հարազատները և ընկերները Եռաբլուրում կհարգեն նրանց հիշատակը։

Յուրի Օհանյանը,Ալբերտ Հովսեփյանը ու ևս մի քանի կամավորականներ, հետմահու պարգևատրվել են «Մարտական Ծառայություն» և «Արիության» մեդալներով։