Չպետք է սրանց թույլ տալ, որ ՀՀ-ում ազատ խոսքի, բազմակարծության միջավայրը վերջնականպես վերացնեն. Աննա Մկրտչյան

«Հայաստանում այսօր այն իրավիճակն է, որ խոսքի ազատության, մարդու իրավունքների սահմանափակումները տարածվում են բոլորի վրա անկախ իր կարգավիճակից»,-ասաց ԱԺ «Պատիվ ունեմ» խմբակցության պատգամավոր Աննա Մկրտչյանը Այլընտրանքային նախագծեր խմբի կազմակերպած «Դեպի բռնապետություն. Հետընթաց իրավունքներից» թեմայով պանելային քննարկման ժամանակ։

Նա նշեց, որ ՀՀ-ում իշխանության աթոռներին նստած անձանց հիմնական գործիքակազմը, գործառույթներն ամբողջությամբ վերաշարադրվել, վերակառուցվել են հենց ճնշման, նույնիսկ ֆիզիկական բռնությունների միջոցով  իրենց համար ճիշտ մթոնոլորտ և միջավայր ստեղծելու համար:

«Իրենց որդեգրած հիմնական սկզբունքն է՝ խոսելուց առաջ մտածեք, հետո մի քիչ էլ մտածեք, հետո մի քիչ ավելի շատ մտածեք ու վերջում մի խոսեք:  Սա է այն ապահովության բանաձևը, որ մեզ համար առաջարկում է Փաշինյանն իր  իշխանամերձ քրեաօլիգարխներով, իշխանամերձ իրավապահ համակարգով»,- ասաց Աննա Մկրտչյանը:

Ընդդիմադիր պատգամավորի խոսքով, առաջին գործիքը, որ իրենք լայնորեն կիրառում են՝  ոլորտի խնդիրները  լուծելու փոխարեն առաջին հերթին  սկսում են խոսքի ազատության սահմանափակումներից:

«Երկրորդ՝ իրենց այլևս չեն թաքցնում, որ Հայաստանում չկա  ուղղակի իշխանությունների տարանջատման սկզբունքը, չի գործում: Իմ համոզմամբ, Փաշինյանի կողմից ոչ թե խոսքի վրիպումներ են, որ կառավարության նիստի ժամանակ ուղղակիորեն հրահանգավորում է  ԱԱԾ տնօրենին, ոստիկանապետին՝  խոսելով ձերբակալությունների, կալանավորումների մասին, կամ ԱԺ-ում  պատգամավորների հարցերին պատասխանելու փոխարեն մոտենում է  ամբիոնին ու ասում, որ ձեր հետևողականության շարունակականությունը կարող է բերել նրան, որ ԱԱԾ-ն սկսի զբաղվել ձեզնով»,- ասաց Ա.Մկրտչրյանը:

Նրա կարծիքով, սա անում է դիտավորյալ, շատ լավ հասկանալով, որ չունի դրա իրավասությունը, ՀՀ-ում  քրեադատավարական ընթացակարգերը հստակ սահմանաված են Սահմանադրությամբ և օրենսդրությամբ,  բայց ի լուր հանրությանը ցույց է տալիս, որ ունի այդ իշխանությունը, իր համար չկան սահմանափակումներ,  եթե ցանկանա այս բնագավառում լինեն կալանավորում, դրանք կլինեն անկախ հիմնավորումները բավարար են, կան, չկան:

«Ստացում է՝  իշխանությունը զավթած անձինք հասնում են իրենց ցանկալի իրավիճակին ուղղակի Հայաստանում կտրուկ նվազում է  բազմակարծությունը, եթե չասեմ վերանում է, մարդիկ սկսում են իրենց կարծիքը չարտահայտել, կամ զգուշավոր, այնպիսի բառապաշարով, որոնք հաճելի են իշխանություններին:

Վստահ եմ՝ այս հանգամանքի դեմ պայքարելու միակ ձևը պարբերաբար, առանց ենթարկվելու այն հանգամանքին, որ լինելու են բռնաճնշումներ, խոսել և թույլ չտալ սրանց, որ Հայաստանում ազատ խոսքի, բազմակարծության միջավայրը վերջնականպես վերացնեն»,- ասաց «Պատիվ ունեմ» խմբակցության պատգամավորը:

Ըստ նրա, Հայաստանում բազմակարծության թեմայի փակումը կբերի այս իշխանության երկարաձգմանը, քանի որ, ինչպես ստի, կեղծիքի մանիպուլյացիայի ազդեցության տակ  կարողացան գալ իշխանության, այդպես պետք է հաստատեն անդեմ հասարակություն, որը որևէ վտանգ  չի ներկայացնի իրենց իշխանությանը: