«Հրապարակ». Որոնք են «Պատիվ ունեմ» խմբակցությունից դուրս գալու Իշխան Զաքարյանի դրդապատճառները

«Հրապարակ» թերթը գրում է. «Իշխան Զաքարյանը երեկ չէր ուզում մեկնաբանել մեր տեղեկությունը, թե ինքը «Պատիվ ունեմ» խմբակցությունից դուրս է գալիս` պահելով մանդատը։ Նա ո՛չ հերքեց, ո՛չ հաստատեց մեր լուրը. «Եկեք երկուշաբթի օրը բոլորիդ հրավիրեմ, խոսենք»: Դուք ընդդիմադիր պատգամավոր եք, ինչո՞ւ եք դուրս գալիս ընդդիմադիր խմբակցությունից։ «Էլի եմ մնալու ընդդիմադիր, երբեք չկասկածեք, որ ընդդիմադիր չեմ լինելու»: Իսկ խմբակցությունում կարծում են, որ վճռորոշ է եղել նրա նկատմամբ հարուցված քրեական գործը: Սակայն այլ տարբերակներ էլ են շրջանառվում: Մեկը Սերժ Սարգսյանի ու ՀՀԿ-ի հետ դաշինքն է, որին Զաքարյանը դեմ է եղել ժամանակին:

Հիշեցնենք, որ Վերահսկիչ պալատի նախագահի պաշտոնում նա լուրջ հակասություններ ուներ Սարգսյանի հետ։ Մյուս պատճառը, ըստ Զաքարյանի մտերիմների, Հայաստան-Ռուսաստան միության ստեղծմանն ուղղված գործընթացներն են: Լուկաշենկոն և Պուտինը նախօրեին ստորագրեցին Միութենական պետության դեկրետը:

Առաջիկայում այս պրոցեսին փորձելու են ներգրավել նաև Հայաստանը, և Իշխան Զաքարյանն այս գործընթացում որոշակի դերակատարում է ունենալու` օգտագործելով ռուսաստանյան իր կապերը: Նա մերձավորներին ասել է, որ ուզում է ազատ կարգավիճակ ունենալ, որ զբաղվի այդ գործով` կաշկանդված չլինելով որևէ կուսակցության կամ դաշինքի կողմից»։

Մանրամասները թերթի այսօրվա համարում: