Պուտինը՝ Ալիևի հետ հանդիպմանը. Ցավոք սրտի, դեռ առանց զոհերի չի ստացվում

Սոչիում մեկնարկել են Ռուսաստանի ու Ադրբեջանի նախագահների երկկողմ բանակցությունները։ Դրանց ավարտից հետո Պուտինը կհանդիպի Փաշինյանին։

«ՏԱՍՍ»-ի փոխանցմամբ, Պուտինը նախ խոսել է երկկողմ առևտրատնտսական կապերի մասին, շնորհակալություն հայտնել Ալիևին իր երկրում ռուսաց լեզվին ուշադրություն դարձնելու համար։

«Ինչ վերաբերում է Լեռնային Ղարաբաղի խնդրի կարգավորմանը, ապա մենք այդ մասին կխոսենք եռակողմ ձևաչափով։ Քիչ անց մեզ կմիանա Հայաստանի վարչապետը և մենք կշարունակենք այս քննարկումը»,- ասել է Պուտինը։

ՌԴ նախագահը նշել է, որ իր կարծիքով, ռուս խաղաղապահներն այդ հարցում դրական դեր են խաղում, ակտիվորեն աշխատում է հրադադարի վերահսկման ռուս-թուրքական կենտրոնը։

«Ցավոք, կան խնդիրներ, միջադեպեր։ Ցավոք սրտի, առանց զոհերի մինչ այդ պահը չի ստացվում։ Բայց մենք դրա համար ենք հավաքվել, տեսնելու, թե ինչ է արված, ինչ է պետք անել, որպեսզի ոչ միայն նման դեպքեր չլինեն, այլև հակառակը՝ պայմաններ ստեղծվեն իրավիճակի հանդարտացման ու տարածաշրջանում այնպիսի իրավիճակի զարգացման համար, որը թույլ կտա մարդկանց հանգիստ ապրել, իսկ երկրներին զարգանալ»,- ասել է Վ. Պուտինը։