Սոչիում ընդունված հայտարարությունում հայանպաստ որևէ կետ չեմ գտնում. Թովմասյան

«Սոչիում ընդունված հայտարարությունում հայանպաստ, Հայաստանի շահի հետ համադրվող որևէ կետ չեմ գտնում: Փորձում եմ գտնել, չեմ գտնում»,- լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Թագուհի Թովմասյանը:

Նրա խոսքով, փաստաթղթում հղում է արվում 2020 թ. նոյեմբերի 9-ի հայտարարությանը գերիների մասով:

«Բայց նոյեմբերի 9-ի հայտարարության մեջ էլ պարզ գրված էր գերիների վերադարձ՝ բոլորը բոլորի դիմաց, բայց մեկ տարի է չի իրականացվել: Հետևաբար, չիրականացված փաստաթղթի չիրականացված  կետի վրա հղում կատարելն աբսուրդ է:

Ես կարծում էի, որ Նիկոլ Փաշինյանը գոնե հատուկ կարծիք կգրեր այդ փաստաթղթին կից կամ որևէ այլ ձևով կարտահայտեր իր վերաբերմունքը, քանի որ մեկ տարի է անցել, և մենք  ունենք չվերադարձած գերիներ: Ավելին, Ալիևը հայտարարում է, որ նրանք ռազմական հանցագործներ են, իրենք գերիներ չունեն իրենց մոտ»,- ասաց Թ. Թովմասյանը:

Ինչ վերաբերում է սահմանազատման գործընթացին, ընդդիմադիր պատգամավորի խոսքով,  իհարկե, կարող է սկսվել նման գործընթաց, բայց Հայաստանին  ամենևին ձեռնտու չէ, քանի որ Հայաստանն այդ ճանապարհով Արցախի վրա է փակում իր վերջին դուռը, Արցախը  մնում է Ադրբեջանի կազմում անկլավի կարգավիճակով: 

«Մենք դա երբեք չենք կարող թույլ տալ, քանի դեռ Արցախի կարգավիճակի հարցը վերջնականապես չի հստակեցվել»,- ասաց «Պատիվ ունեմ» խմբակցության պատգամավոր Թագուհի Թովմասյանը: