Անկարան եվրոպական իրավապահ մարմիններին կոչ է անում խուսափել Թուրքիայի վրա ճնշումներից

Հինգշաբթի Թուրքիան Եվրոպայի խորհրդին կոչ է արել խուսափել Անկարայի վրա ցանկացած ճնշում գործադրելուց՝ կապված Փարիզում ծնված թուրք գործարար և քաղաքացիական ակտիվիստ Օսման Քավալայի գործով նախատեսված վճռի հետ: «Ինտերֆաքս»-ի փոխանցմամբ՝ այդ մասին հաղորդել են եվրոպական լրատվամիջոցները:

«Ընթացիկ դատական գործընթացի նկատմամբ հարգանքի սկզբունքից ելնելով` մենք կոչ ենք անում Եվրոպայի խորհրդին խուսափել որոշումներ կայացնելուց, որոնք կարող են դիտվել որպես միջամտություն դատական համակարգի անկախությանը»,- Թուրքիայի ԱԳՆ-ի հայտարարությունից մեջբերում է արել մամուլը։

Թուրքիայի շուրջ դիվանագիտական սկանդալը ծագել է հոկտեմբերին, այն բանից հետո, երբ Գերմանիայի, Դանիայի, Կանադայի, Նիդեռլանդների, Նոր Զելանդիայի, Նորվեգիայի, ԱՄՆ-ի, Ֆինլանդիայի, Ֆրանսիայի և Շվեդիայի դեսպանները հանդես եկան համատեղ հայտարարությամբ՝ կոչ անելով Թուրքիայի իշխանություններին «շուտափույթ և հնարավորինս արդարացիորեն լուծել Քավալայի հարցը», որը երկար ժամանակ բանտում է՝ առանց մեղադրական վճռի կայացման։

Նրանք նշել են, որ Քավալայի կալանավորման շարունակումը «ստվեր է գցում» Թուրքիայի վրա։ Դրանից հետո այս տասը երկրների դեսպանները կանչվել են Թուրքիայի ԱԳՆ։ ԱԳՆ-ն համարել էր, որ այդ հայտարարությունը հակասում է դիվանագիտական պրակտիկային և այն անվանել է անընդունելի։

Փարիզից 64-ամյա թուրք հումանիստ և ակտիվիստ Օսման Քավալան, որը նաև Հայոց ցեղասպանության ճանաչման կողմնակից է, 2017 թվականից գտնվում է Թուրքիայի բանտում՝ առանց որևէ դատավճռի։ Նա մեղադրվում էր 2013 թվականին հակակառավարական ցույցերին մասնակցելու, ինչպես նաև 2016 թվականին Թուրքիայում ռազմական հեղաշրջման փորձին մասնակցելու մեջ։