Օկուպացված Քարին Տակում երկու ադրբեջանցի է պայթել ականի վրա

Ղարաբաղյան երրորդ պատերազմի հետևանքով ադրբեջանական ԶՈՒ-ի կողմից օկուպացրած Քարին Տակ գյուղում ականի պայթյունից երկու ադրբեջանցի է մահացել։ Ադրբեջանի ականազերծման գործակալության փոխանցմամբ, դեպքը տեղի է ունեցել այսօր առավոտյան։

Մահացածների՝ 22-ամյա Օրհան Խանաթովի ու 28-ամյա Վուսալ Գյանդիևի մարմինները դուրս են բերվել ականազերծված տարածքից։

Հիշեցնենք, որ վերջերս Ադրբեջանը հայտնել էր՝ Արցախում իր վերահսկողության տակ անցած տարածքներում վերջին մեկ տարվա ընթացքում ականների վրա պայթել է Ադրբեջանի 24 քաղաքացի։ Եվս 49 մարդ ականների պայթունների հետևանքով վնասվածքներ է ստացել։

2020-ի նոյեմբերի 10-ից ի վեր Ադրբեջանի կողմից օկուպացրած հայկական տարածքներում ընդհանուր առմամբ մահացել է ադրբեջանցի 180 զինվորական ու քաղաքացիական անձ։