Ռոսսելխոդնադզորն արգելել է Ղազախստանից մսի և կաթի ներկրումը

Ռուսաստանի իշխանությունները կարգադրել են կասեցնել Ղազախստանից կենդանի կենդանիների և մսի ներկրումը։ Որոշումը պայմանավորված է այդ երկրում դաբաղի տարածմամբ։

Այդ մասին հայտարարել է Անասնաբուժական և բուսասանիտարական վերահսկողության դաշնային ծառայությունը (Ռոսսելխոզնադզոր):

Որոշումը տարածվում է նաև կրկեսային կենդանիների վրա։ Բացի այդ, Ռոսսելխոզնադզորի որոշմամբ արգելվել է այդ երկրից ներկրել նաև կաթ-կաթնամթերք, որոնք ջերմային մշակման ենթարկված չեն։

Ղազախստանից Ռուսաստան չեն ներկրվի նաև կենդանական և բուսական ծագման կերեր և կերային հավելումներ, բուրդ, կաշի, ինչպես նաև օգտագործված սարքավորումներ, որոնք նախատեսված են կենդանիներին մորթելու համար։