Ռուս տիեզերագնացին ԱՄՆ-ը վիզա չի տրամադրել

Ամերիկայի Միացյալ Նահանգներն առանց բացատրության վիզա չի տրամադրել ռուս տիեզերագնաց Նիկոլայ Չուբին։ Այս մասին «Ռիա Նովոստի»-ին հայտնել է իրազեկ աղբյուրը։

«Տիեզերագնաց Նիկոլայ Չուբին, ում թռիչքը դեպի Միջազգային տիեզերակայան նախատեսված է 2023 թվականի գարնանը, առանց բացատրության մերժել են ԱՄՆ մուտքի վիզա տրամադրել»,- ասել է աղբյուրը։

Նա պարզաբանել է, որ բոլոր ռուս տիեզերագնացները Միջազգային տիեզերակայան թռիչքներից առաջ ավանդաբար վերպատրաստում են անցնում Ջոնսոնի անվան տիեզերական կենտրոնում:

«Ռոսկոսմոսը» չի մեկնաբանել ռուս տիեզերագնացին վիզա չտրամադրելու մասին տեղեկությունը։

Նիկոլայ Չուբը միացել է Ռուսաստանի տիեզերագնացների կորպուսին 2012 թվականին, նա դեռ թռիչքի փորձ չունի։ Ավելի վաղ հաղորդվում էր, որ փորձառու տիեզերագնաց Օլեգ Կոնոնենկոյի և մեկ այլ նորեկ Անդրեյ Ֆեդյաևի հետ նա նշանակվել է «Սոյուզ ՄՍ-23» տիեզերանավի անձնակազմում, որը կայան կմեկնի 2023 թվականի գարնանը։