Հայաստանում էլեկտրաէներգիայի արտադրությունը շարունակում է նվազել

2021 թվականի հունվար-նոյեմբերին Հայաստանում արտադրվել է 6 մլրդ 848.4 մլն կՎտ/ժ էլեկտրաէներգիա, ինչը 2020 թվականի նույն ժամանակահատվածի համեմատ նվազել է 2%-ով։

Ինչպես Panorama.am-ը տեղեկանում է ՀՀ վիճակագրական կոմիտեից, Հայաստանի ատոմային էլեկտրական կայանը (ՀԱԷԿ) 11 ամիսներին արտադրել է 1 մլրդ 679.6 մլն կՎտ ժամ էլեկտրաէներգիա՝  2020թ-ի նույն ժամանակահատվածի համեմատ նվազելով 31․6%-ով։

Ըստ վիճակագրության՝ 38.9%-ով նվազել է հողմային էներգիայի արտադրությունը՝ կազմելով 1.1 մլն կՎտ ժամ։ 2020 թվականի հունվար-նոյեմբերին հողմային էներգիայի արտադրությունը կազմել է 1.8 մլն կՎտ ժամ։

Ինչ վերաբերում է ՋԷԿ-երի արտադրությանը, ապա 2021 թվականի հունվար-նոյեմբերին այն ավելացել է 5.1%-ով և կազմել 3 մլրդ կՎտ ժամ, իսկ ՀԷԿ-երի արտադրությունը՝  25.5%-ով և կազմել 2 085.4  մլն կՎտ ժամ։

2021թ-ի 11 ամիսներին հանրապետությունում արևային էլեկտրակայաններն արտադրել են 82.3 մլն կՎտ ժամ էլեկտրաէներգիա՝ 2020 թվականին նույն ժամանակահատվածի համեմատ աճելով 4.2 անգամ։