Չեմ կարծում՝ գազի գնի թանկացումը շոկային ազդեցություն կունենա մեր բիզնեսի վրա. Մհեր Գրիգորյան

«Ես այս պահին կարող եմ վստահաբար ասել, որ անապահովների համար գազի սակագինը չի թանկանալու և այդ հնարավորությունը կա»,- հայտարարեց ՀՀ զինված ուժերի ստեղծման օրվա կապակցությամբ Եռաբլուր այցելած փոխվարչապետ Մհեր Գրիգորյանը և բացատրեց, որ ՀՀ սահմանին 2022 թ. գազի գինը չի փոփոխվելու:

Նրա խոսքով՝ ՀՀ-ՌԴ միջև դեռևս 2013 թվականին կնքված պայմանագրով կա բանաձև, որի կիրառումը սկսվում է 2022 թվականին և որում սահմանվում է՝  ՀՀ սահմանին գազի գինը հաշվարկվում է կալորիականությունից ելնելով:

Ըստ Գրիգորյանի՝ գազի սակագնի կառուցվածը բաղկացած է մի քանի բաղադրիչից, որոնցից մեկը սահմանին նրա արժեքն է և կալորիականության հաշվին հավելյալ պոտենցիալ ծախսը, որն այնքան մեծ չէ և  հնարավոր չլինի հարթել մնացած սակագնային պլանի մեջ:

«Բիզնեսի համար, անկեղծ ասած, եկեք սպասենք, թե Հանրային ծառայությունները կարգավորող հանձնաժողովի քննարկումների արդյունքում ինչ սակագնային պլան կնշմարվի, բայց ես կարծում եմ, որ ՀՀ սահմանին և աշխարհում գազի գնի տարբերությունն այնքան մեծ է, որ պետք է գազի գնի կամ էներգիայի գնի հետ կապված մրցակցային որևէ շոկ չլինի հայկական արտադրողի համար»,-ասաց փոխվարչապետը:

Նա բացատրեց, որ աշխարհի շատ երկրներում գազի գինն անհամեմատ ավելի շատ է բարձրացել և չի կարծում, որ այն շոկային ազդեցություն կունենա հայկական այն բիզնեսների համար, որոնք շատ են սպառում գազ կամ էլեկտրաէներգիա՝ շեշտելով, որ խոսում է միայն 2022 թ. համար:

Փոխվարչապետի տեղեկացմամբ ԵԱՏՄ-ում գազի հարցում միասնական շուկայի կանոնն ուժի մեջ է մտնում 2024 թվականից և քննարկվում է գազի գնի երկու բաղադրիչ՝ ինքնարժեքը և տեղափոխման ծախսերը և վերջինն է բարդ քննարկումների առարկա:

«ԵԱՏՄ-ում գազի միասնական գնի վերաբերյալ կոնսենսուս կա, տեղափոխման ծախսերն են խնդիրը»,- ասաց Մհեր Գրիգորյանը և հույս հայտնեց, որ ԵԱՏՄ-ում նաև միասնականություն կլինի վերջին հարցի վերաբերյալ: