Այսօր ժամը 9.00-ից Լարսը բացվել է բոլոր տեսակի տրանսպորտային միջոցների համար

Ռուսաստանն ու Վրաստանը կապող վրացական ռազմական մայրուղու(Լարսի) երթևեկությունը բաց է բոլոր տեսակի տրանսպորտային միջոցների համար: «Ինտերֆաքս»-ի փոխանցմամբ, շաբաթ օրն այդ մասին հաղորդել է Հյուսիսային Օսեթիայի արտակարգ իրավիճակների նախարարության գլխավոր վարչության մամուլի ծառայությունը։

«Վրաստանի տարածքում ճանապարհահատվածի մաքրումից, տրանսպորտային միջոցների անվտանգ երթևեկությունն ապահովելու հնարավորության ապահովումից հետո Վրաստանի սահմանապահ ոստիկանության առաջարկությամբ հունվարի 29-ի ժամը 8:20-ից մինչև հաջորդ ծանուցումը թույլատրվել է բոլոր տեսակի տրանսպորտային միջոցների երթևեկությունը Ռուսաստանի Դաշնության Վլադիկավկազ բնակավայրից դեպի Լարս»,-ասված է հաղորդագրությունում։

Ըստ հաղորդագրության, Վրաստանի ռազմական մայրուղին անցած գիշեր փակ է եղել ծանր մեքենաների համար՝ Վրաստանում եղանակային պայմանների վատթարացման պատճառով։

Վրաստանի ռազմական մայրուղին ներկայումս միակ ցամաքային ճանապարհն է, որը Ռուսաստանի հետ կապում է ոչ միայն Վրաստանը, այլև Հայաստանը ։