Մակրոնը Զելենսկու խնդրանքով զանգահարել է Պուտինին

Ֆրանսիայի նախագահ Էմանուել Մակրոնը հայտնել է, որ Ուկրաինայի նախագահ Վլադիմիր Զելենսկու խնդրանքով զանգահարել է ՌԴ նախագահ Վլադիմիր Պուտինին։ Ռիա նովոստին գրում է, որ հինգշաբթի երեկոյան ֆրանսիական կողմի նախաձեռնությամբ հեռախոսազրույց են ունեցել Ռուսաստանի Դաշնության և Ֆրանսիայի նախագահները։

«Նախագահ Զելենսկու խնդրանքով ես արագ, անկեղծ և անմիջական զրույց եմ ունեցել նախագահ Պուտինի հետ, որպեսզի նախ՝ խնդրել ռազմական գործողությունների շուտափույթ դադարեցում, և երկրորդ՝ առաջարկել զրուցել Զելենսկու հետ, ով դա խնդրում է, բայց նա ինքը չի կարողացել կապ հաստատել նրա հետ»,- ասել է Ֆրանսիայի ղեկավարը։

Նա հավելել է, որ նաև Ռուսաստանի նախագահին «մեսիջ է փոխանցել Ֆրանսիայից և Զելենսկու ուղերձը»։

«Առայժմ դա արդյունք չի տվել»,- նշել է Մակրոնը։

Ֆրանսիայի նախագահը վերահաստատել է իր մտադրությունը՝ «աշխատել ռազմական գործողությունների դադարեցման ուղղությամբ, երբ հնարավոր է»:

Կրեմլից ավելի վաղ հայտնել էին, որ Պուտինն ու Մակրոնը «լրջորեն և անկեղծորեն» կարծիքներ են փոխանակել ուկրաինական իրադարձությունների հետ կապված, Պուտինը սպառիչ բացատրություններ է տվել իրավիճակի վերաբերյալ։