Ադրբեջանական զինուժն ականանետից կրակոցներ է արձակել Արցախի Խնուշինակ գյուղի ուղղությամբ

Ադրբեջանական զինուժը ականանետից կրակոցներ է արձակել Արցախի Մարտունու շրջանի ուղղությամբ։ Այս մասին գրում է «Sputnik Արմենիա»-ն՝ վկայակոչելով Արցախի ՊԲ-ի զրուցակցին։

«Ներկա պահին այլ մանրամասներ չեն հաղորդվում։ ՊԲ–ն խոստանում է առաջիկայում հանդես գալ պաշտոնական հայտարարությամբ։

Մինչ այդ Մարտունիից հայտնեցին, որ կրակոցները Մարտունի քաղաքի ուղղությամբ չեն եղել, այլ հարակից` Խնուշինակ գյուղի ուղղությամբ։ Գյուղից էլ մեզ հայտնեցին, որ կրակոցները եղել են գյուղի խաղողի այգիների ուղղությամբ, տեղում հայտնաբերվել է 4 արկ։

Ավելի վաղ համացանցում լուրեր էին տարածվել, որ ադրբեջանական զինուժը ականանետից 5-6 կրակոց է արձակել Արցախի Մարտունի քաղաքի ուղղությամբ»,-գրում է աղբյուրը։

Լուսանկարը՝ 2020 թիվ, նոյեմբեր, երբ ադրբեջանական զինուժի՝  Խնուշինակ գյուղի թիրախավորումից զոհվել էր քաղաքացիական անձ՝ 53-ամյա Արմո Ավետիսյանը։