Reuters. ԵՄ-ն մշակում է Ռուսաստանի դեմ պատժամիջոցների հինգերորդ փաթեթը

Եվրամիությունն աշխատում է Ռուսաստանի դեմ պատժամիջոցների հինգերորդ փաթեթի վրա՝ կապված Ուկրաինայի իրադարձությունների հետ։ Այս մասին երկուշաբթի հայտնել է Reuters գործակալությունը՝ հղում անելով ԵՄ դիվանագիտական աղբյուրներին։

«Մենք աշխատում ենք պատժամիջոցների հինգերորդ փաթեթի վրա, առաջարկվում են բազմաթիվ նոր անուններ»,- ԵՄ ներկայացուցչի խոսքերը մեջբերում է Reuters-ը։

Բացի այդ, ԵՄ դիվանագետները գործակալությանը հայտնել են, որ մերձբալթյան երկրները, այդ թվում՝ Լիտվան, պնդում են Մոսկվայի դեմ նավթի էմբարգո սահմանելու տարբերակը։ Գերմանիան հետ է պահում հապճեպ քայլեր ձեռնարկելուց, քանի որ Եվրոպայում էներգակիրների գները բարձր են։

Երկուշաբթի օրը Բրյուսելում տեղի կունենա ԵՄ երկրների արտաքին գործերի և պաշտպանության նախարարների ծրագրված հանդիպումը, որի գլխավոր թեման կլինի Ուկրաինայում տիրող իրավիճակը։ Դրա ժամանակ ԵՄ արտաքին քաղաքականության դեպարտամենտի ղեկավար Ժոզեպ Բորելը նախարարներին կներկայացնի հակամարտության զարգացման հնարավոր սցենարների իր վերլուծությունը։