Երևանում կայացել է հայ-ֆրանսիական «Երբ ես տխուր եմ» անիմացիոն ֆիլմի պրեմիերան

Ապրիլի 12-ին Երևանում տեղի ունեցավ հայ-ֆրանսիական «Երբ ես տխուր եմ» կարճամետրաժ անիմացիոն ֆիլմի պրեմիերան։ Ֆիլմի ռեժիսորը, նկարիչը, համասցենարիստն ու բանաստեղծության հեղինակն է Լիլիթ Ալթունյանը, պրոդյուսերը, համասցենարիստն ու հայերեն ֆիլմի դերակատարը՝ Արմինե Անդան, կոմպոզիտորը Միքայել Ոսկանյանը։ Ֆիլմի արտադրողն է «Հոշկի ֆիլմ» ընկերությունը, համարտադրողը ֆրանսիական «Ֆոլիմաժ» անիմացիոն ստուդիան։

Ֆիլմի ստեղծագործական խումբը հայտնում է, որ ֆիլմը Հայաստանում անիմացիայի բնագավառում առաջին համատեղ արտադրությունն է։

Ֆիլմի ճանապարհորդությունը սկսվել է՝ որպես նախագիծ դառնալով Աշխարհի անիմացիաները ծրագրի հաղթող՝ Ռեանիմանիայում և ստանալով Ֆոլիմաժի համատեղ արտադրության մրցանակը՝ Անսիի կինոփառատոնում։

Ֆիլմի համաշխարհային պրեմիերան տեղի է ունեցել «Անիմեսթ» միջազգային անիմացիոն կինոփառատոնում՝ Ռումինիայում, 2021 թ հոկտեմբերի 15-ին, իսկ ասիական պրեմիերան՝ «Բուչոնի» միջազգային անիմացիոն կինոփառատոնում՝ Հարավային Կորեայում, երկուսն էլ ՝ «Օսկար» որակավորման։