«Մեկ օրվա եկամուտդ նվիրաբերի՛ր գիտական նախագծին»

Ապրի՛լ նախաձեռնությունը բոլորին կոչ է անում իրենց մեկ օրվա եկամուտը ներդնել իրենց ընտրած գիտական նախագծերի մեջ։

Panorama.am-ին նախաձեռնությունից հայտնեցին, որ երկու շաբաթվա ընթացքում նպատակի իրականացմանը միացել է 36 ընկերություն ու անհատ, հավաքվել է ավելի քան 5 մլն դրամ։ 

«Ձեր մեկ օրվա աշխատանքը կարող է փոխել Հայաստանի ապագան՝ ներդրեք մի օրվա եկամուտը գիտության մեջ, որ միասին կառուցենք հզոր պետություն»,-նշում են նախաձեռնությունից։

Ապրի՛լ նախաձեռնությունը համոզված է, որ զարգացած գիտությունն է անվտանգության ապահովման, հզոր տնտեսություն, դիվանագիտություն և մրցունակ հասարակություն ունենալու հիմքը: Հայաստանն այդ հիմքն ամրացնելու կարիք ունի։ 

Աջակցության համար առաջարկվող նախագծերն են`

1․ Հայոց ցեղասպանության թանգարան-ինստիտուտի կողմից հրատարակվող «International Journal of Armenian Genocide Studies» ամսագիրը «Scopus» գիտատեղեկատվական հարթակում ինդեքսավորելու ծրագրի նախագիծ։

«IJAGS»-ը կլինի «Scopus»-ում Հայոց ցեղասպանության ուսումնասիրության թեմայով առաջին և միակ ամսագիրը և Հայաստանի համար տեղ կապահովի ցեղասպանագիտության ոլորտում։

2․ Հաշվողական ենթակառուցվածք՝ գենոմիկայի և կենսատեխնոլոգիաների համար։

Հայաստանում կստեղծվի առաջին կենտրոնացված հաշվողական ենթակառուցվածքը, որը թույլ կտա մեր կենսաբազմազանության ու մարդկանց գենետիկական հատկանիշների տվյալները անվտանգ պահպանել և վերլուծել։

3․ Մոլեկուլյար լաբորատորիա բուսաբանության ինստիտուտում։

Ինստիտուտում կգործի բույսերի, սնկերի, մամուռների և քարաքոսերի ուսումնասիրության նպատակով ժամանակակից մոլեկուլային լաբորատորիա։

4․BIOCER Scientific նախագիծ։

«BIOCER»-ը կենսաակտիվ կենսաքայքայվող նյութ է, որը ժամանակի ընթացքում քայքայվում է՝ խթանելով բնական ոսկորի աճը և վնասված ոսկորի ամբողջական վերականգնումը։
 

5․ Ռադիոհաճախականային և ձայնային ազդանշանների ուղղորոշման ու տեղորոշման համակարգի փորձանմուշի մշակում։

Այս նախագծով առաջարկվում է ստեղծել համալիր համակարգ, որը կապահովի ռադիոհաճախային և ձայնային ճառագայթում ունեցող աղբյուրների ուղղորոշման և տեղորոշման խնդիրները: