Դիահերձարանում՝ չճանաչված մասունքներ, նույն քաղաքի ռեստորանում՝ պաշտպանության նախարարի հարսանիք

Ֆրանսիայի հրապարակում ընթացող «Դիմադրության» շարժման հանրահավաքին ՍԴ աշխատակազմի նախկին ղեկավար Էդգար Ղազարյանն ընթերցեց «Ի պաշտպանություն Արցախի» քաղաքացիական նախաձեռնության 2022 թվականի մայիսի 27-ի հայտարարությունը:

Ուղերձում ասվում է, որ նախաձեռնությունը դատապարտում է գործող իշխանությունների ցանկացած բանակցություն, որը բացառում է Արցախի՝ Ադրբեջանից անկախ հարատևումը:

Հայտարարությունն ընթերցելուց հետո, նկատելով, որ մարդասպանը ցանկանում է թաքցնել իր հանցանքի հետքերը՝ Ղազարյանը հայտնեց, որ մինչև հիմա հասարակությունը հստակ չգիտի, թե քանի մարդ է իր կյանքը զոհաբերել հանուն հայրենիքի պաշտպանության և փրկության:

Նա հայտնեց, որ պատերազմից հետո իշխանության մարմինները զոհերի 7 թիվ են պաշտոնապես հրապարակել, որոնք տարբերվում են միմյանցից:

ՍԴ աշխատակազմի նախկին ղեկավարը հիշեցրեց, որ առաջին անգամ թիվ էր հրապարակել Վատիկանում նախկին դեսպան Միքայել Մինասյանը,  հայտնելով, որ իր ունեցած տվյալներով պատերազմում զոհվել է 4750 մարդ:

«2021 թվականի հունվարի 5-ին, ի պատասխան լարգրողների հարցմանը, ՊՆ-ն հայտնել էր, որ զոհվածների թիվը պետական գաղտնիք է և չեն կարող հրապարակել, բայց արդեն հունվարի 20-ին փոխվարչապետ Տիգրան Ավինյանը ԱԺ-ում հայտնում է, որ  զոհվածների թիվը 3439 է, 2021թ ապրիլի 14-ին ԱԺ-ում Նիկոլ Փաշինյանը տեղեկացնում է, որ զոհերի թիվը 3621 է:
Ամենասարսափելին այն է, որ նա այդ նույն օրն ասում է, որ զոհերի թիվը դեռևս ճշտվում է, այն 4000-ի կարգի է, +/- 50»,-ասաց Էդգար Ղազարյանը:

Նա շարունակեց հիշատակել զոհերի թվի պաշտոնական հրապարակումները և հիշեց, որ 2021 թվականի հունիսի 7-ին Արմավիրի մարզի համայնքներից մեկում Փաշինյանը հայտնել է, որ զոհերի թիվը կլինի մոտավորապես 3700, իսկ օգոստոսի 24-ին՝ 3773 և երկու օր անց էլ հնչեցրել է 3777 թիվը:

Ղազարյանը նկատեց, որ խոսքը գնում է բանակի մասին, որտեղ մեկ անվանականչով կարող են պարզել, թե քանի զինվոր է բացակա, քանիսը վիրավոր:

Շարունակելով ներկայացնել զոհերի թվերը՝ ՍԴ աշխատակազմի նախկին ղեկավարն ասաց, որ 2022 թվականի հունվարի 19-ին քննչական կոմիտեն հայտնել էր, որ զոհվածների թիվը 3809 է, իսկ փետրվարի 10-ին Փաշինյանը հայտարարել էր 3812 թիվը, Արցախի Պաշտպանության բանակն էլ հրապարակել է 2842 զոհվածի անուն:

«Ոչ մի տեղ չի հրապարակվել զոհվածների բոլոր անունները: 3800 մարդու անուն հրապարակեք մի տեղ՝ գրքում , ինտերնետային կայքում: Չեն անում, իսկ ինչո՞ւ, որովհետև թաքցնում են և շատ լավ գիտեն, թե քանի մարդու են սպանել այս պատերազմում: Մեզնից թաքցնում են մեր հերոսներին, նրանց լուսվոր պատկերները, հերոսական անունները, սխրանքները, թույլ չեն տալիս, որ մենք հպարտանանք նրանցով»,-հայտարարեց Էդգար Ղազարյանը և հավելեց. «Հոկտեմբերի 7-ին իրեն խաղաղության պայմանագիր է առաջարկվել, որը նա մերժել է, քանի՞ մարդ է զոհվել դրանից հետո, քանի մարդ է զոհվել հոկտեմբերի 19-ից հետո, քանիսն են զոհվել հոկտեմբերի 5-ի իր ձախողած ռազմական գործողությունների ժամանակ: Փորձագետներ կան, որ ասում են՝ մեկ օրում զոհվել է 800 մարդ: Հայ ժողովրդի պատմության մեջ չի եղել մեկ օր, որի ընթացքում ծնված լինմի 800 տղա, բայց եղել է մի օր, երբ զոհվել է 800 երիտասարդ և այն եղել է այն օրը, երբ վարչապետը եղել է Նիկոլ Փաշինյանը և այդ մարդը դեռ վարչապետ է, իսկ մենք ապրում ենք այս հասարակության մեջ: Մեղք է մեր ապրելը, եթե մենք ներում ենք այս սրիկա մարդասպանին»:

Նա հանրահավաքի բեմից ցուց տվեց երեխայի լուսանկար, որը պահում էր պաստառ՝ «Պահանջում եմ հայրիկիս» գրությամբ և փաստեց, որ իրենց հայրիկներին պահանջող երեխաները հազարներ են:

«Ճիշտ այն օրը, երբ Աբովյանի դիահերձարանում դեռ չճանաչված մասունքներ են եղել՝ Աբովյանի ռեստորանում պաշտպանության նախարարի հարսանիք է եղել»,-ասաց Էդգար Ղազարյանը և, շեշտելով, որ հասարակությունը իրավունք չունի այն հանդուրժելու, մինչև վերջ պետք է պայքարի, հավելեց. «Այս դժոխքը մեր երկիր բերողի պատիժը պետք է տեսնենք, մենք պետք է պատժենք»: