Մենք վստահում ենք մեր տղաներին. Կապառոս

«Մենք գիտակցում ենք, որ հանդիպելու ենք շատ ուժեղ հավաքականի հետ, որի ֆուտբոլիստները շատ մրցունակ են և հանդես են գալիս բարձրակարգ առաջնություններում: Այդ իսկ պատճառով էլ մենք պետք է բավականաչափ լավ հանդես գանք: Ամեն դեպքում մենք վստահում ենք մեր տղաներին և, բնականաբար, հուսով ենք, որ ամեն ինչ բավականին լավ կստացվի մեզ համար»,- Շոտլանդիա-Հայաստան հանդիպմանն ընդառաջ՝ հունիսի 7-ին Գլազգոյի «Հեմփդեն Պարկ» մարզադաշտում ասուլիսում ասել է Հայաստանի ազգային հավաքականի գլխավոր մարզիչ Խոակին Կապառոսը։

Նա նշել է, որ բոլորն էլ գիտակցում են այդ թիմի մակարդակը և բնականաբար գիտեն բոլոր ֆուտբոլիստներին:

Հարցին՝ արդյո՞ք հավատում եք, որ այնպիսի ֆուտբոլիստը, ինչպիսին Էդուարդ Սպերցյանն է, Հայաստանի հավաքականի ապագան է՝ հաշվի առնելով, որ հավաքականի կազմում շատ են երեսուննանց ֆուտբոլիստները. Կապառոսն ասել է. «Անկասկած այո: Բայց ոչ միայն Սպերցյանը, այլ նաև Արթուր Սերոբյանը, Վահան Բիչախչյանը, Ստյոպա Մկրտչյանը, որոնք ևս երիտասարդ են և կարող են համարվել հայկական ֆուտբոլի ապագան»:

Ազգերի Լիգայի Բ լիգայի առաջին խմբի երկրորդ տուրի Շոտլանդիա-Հայաստան հանդիպումը կկայանա այսօր և  կմեկնարկի Երևանի ժամանակով ժամը 22։45-ին։