20 ծնունդ, 31 նոր հղիություն պատերազմում զոհվածների ընտանիքներում

Առողջապահության նախարարության Անպտղության հաղթահարման ծրագրին դիմող շահառուների  թիվը տարետարի ավելանում է։ Այս մասին այսօր տեղի ունեցած ասուլիսում ասաց ԱՆ Մոր և մանկան առողջության պահպանման վարչության պետ Նունե Փաշայանը։

Նրա խոսքով՝ այս տարվա առաջին կիսամյակում ծրագրի շրջանակում ծնվել է 44 երեխա, բացի այդ, 6 ամիսներին գրանցվել է 104 նոր հղիություն:

Նունե Փաշայանը հայտնեց, որ 2021 թ-ին սպասարկվել է 917 շահառու, իսկ այս տարվա առաջին կիսամյակում՝  577 շահառու:

Նշվեց նաև, որ ծրագրի շրջանակում իրականացվում են անպտղության պատճառագիտության ախտորոշում և բուժում, մինչև վերարտադրողականության օժանդակ տեխնոլոգիաների կիրառումն իրականացվող պարտադիր հետազոտություններ, ամուսնու կամ դոնորական սերմով արհեստական սերմնավորում, արտամարմնային բեղմնավորման իրականացման մեկ փորձ, իսկ բեղմնավորման 2-րդ փորձը կատարվում է պետության կողմից 50% մասնակցությամբ։

Ծրագրի շահառու կարող են դառնալ հաշմանդամություն ունեցող անձինք, եթե հաշմանդամությունը չի խոչընդոտում կնոջ հղիության կրելուն: Հաջորդ խումբը սահմանամերձ բնակավայրերի բնակիչներն են, ինչպես նաև զինծառայողներն ու զինծառայողներին հավասարեցված անձինք: Շահառու կարող են դառնալ նաև 44-օրյա պատերազմում զոհվածների ծնողները։ 

Վարչության պետը հայտնեց, որ 2022 թվականին կատարվել է փոփոխություն, որի համաձայն, ծրագրին կարող են դիմել նաև դատական կարգով անհայտ կորած ճանաչվածների և 44-օրյա պատերազմից հետո շփման գծում զոհված զինվորների ծնողները:

Նունե Փաշայանի խոսքով՝ զոհված տղաների ծնողների դիմելիությունը գնալով շատանում է, քանի որ մարդիկ համոզվում են, որ արդյունք կա։

Ընդհանուր առմամբ, արտամարմնային բեղմնավորման արդյունքում 44-օրյա պատերազմում զոհվածների ընտանիքներում ծնվել է 20 երեխա, այս պահին գրանցված է 31 նոր հղիություն։