Ախալքալաքում COVID-19-ը «բավականին տարածված» է, բայց 1 շաբաթում գրանցվել է 1 դեպք

Ախալքալաքի Հանրային առողջության կենտրոնի պաշտոնական տվյալների համաձայն՝ մեկ շաբաթում մունիցիպալիտետում հայտնաբերվել է կորոնավիրուսի 1 նոր դեպք։

Jnews-ի հաղորդմամբ, Ախալքալաքի ՀԱԿ-ի տնօրեն Սիրանուշ Տոնականյանը կարծում է, որ այս ցուցանիշը պայմանավորված է կատարված թեստերի քիչ քանակով, և որ իրականում կորոնավիրուսը բավականին տարածված է շրջանում։

«Ես գիտեմ, որ հիվանդությունն այժմ տարածված է, բայց մարդիկ չեն թեստավորվում, քանի որ ախտանիշները սուր չեն: Ամենից հաճախ դա ջերմությունն է, որը կարող է տևել ընդամենը մեկ օր, լինում է նաև կոկորդի ցավ և ձայնի կորուստ: Հիմնականում վիրուսային հիվանդությունն արդեն հեշտությամբ է ընթանում, ուստի մարդիկ չեն դիմում բժշկի»,- ասել է Սիրանուշ Տոնականյանը։