Ճապոնիայի պետական բյուջեից մոտ 11,7 մլն դոլար կհատկացվի Աբեի հուղարկավորության համար

Ճապոնիայի նախկին վարչապետ Սինձո Աբեի պետական հուղարկավորության ծախսերի ընդհանուր գումարը կկազմի մոտավորապես 1,65 մլրդ իեն (շուրջ 11,7 մլն դոլար): Այս մասին երեքշաբթի կայացած մամուլի ասուլիսի ժամանակ լրագրողներին հայտնել Է Ճապոնիայի նախարարների կաբինետի գլխավոր քարտուղար Հիրոկաձու Մացունոն, փոխանցում է ՏԱՍՍ-ը։

Ըստ նրա՝ միջոցառման պաշտպանությունն ապահովելու համար կուղղվի մոտ 800 մլն իեն (5,7 մլն դոլար), մոտ 600 մլն իեն (4,2 մլն դոլար)՝ օտարերկրյա հյուրերի հյուրընկալությանը և կացարանին։ Արարողությունը Ճապոնիայի բյուջեին կարժենա մոտ 250 մլն իեն (մոտ 1,78 մլն դոլար):

Այսպիսով, Աբեի պետական հուղարկավորության ծախսերի ընդհանուր գումարը կկազմի շուրջ 1,65 մլրդ իեն (11,7 մլն դոլար):

«Մենք կշարունակենք հանգամանորեն պարզաբանումներ ներկայացնել Ճապոնիայի ժողովրդին այդ հարցի վերաբերյալ, ակնկալում ենք, որ նրանք ըմբռնումով կմոտենան», - հավելել է Մացունոն:

Արարողությանը մասնակցելու համար, նրա խոսքով, ժամանելու են շուրջ 50 օտարերկրյա բարձրաստիճան պատվիրակություններ։

Հիշեցնենք, որ Սինձո Աբեն հարձակման էր ենթարկվել հուլիսի 8-ին, երբ նա ելույթ էր ունենում Նարա քաղաքում՝ խորհրդարանի վերին պալատի ընտրություններից առաջ նախընտրական քարոզարշավի շրջանակներում։ 41-ամյա Տեցույա Յամագամին ինքնաշեն զենքից երկու անգամ կրակել է նախկին վարչապետի վրա։ Լրատվամիջոցների տեղեկություններով՝ նա առաջին կրակոցն արձակել է 7 մ հեռավորությունից, որից մոտ երկու-երեք վայրկյանում Աբեին մոտեցել է և արձակել երկրորդ կրակոցը, որը դարձել է մահացու։

Աբեն հիվանդանոց է տեղափոխվել փրկարարական ուղղաթիռով։ Բժիշկները նրան արյուն են ներարկել ու մի քանի ժամ պայքարել նրա կյանքի համար, սակայն փրկել չի հաջողվել։ Աբեն 67 տարեկան էր։