Գերմանիան զգուշացնում է էներգետիկ ճգնաժամի պատճառով հիվանդանոցների փակման մասին

Գերմանիայում էներգետիկ ճգնաժամի պատճառով շուտով հիվանդանոցները կարող են փակվել։ Այս մասին կիրակի օրը՝ հոկտեմբերի 16-ին, հայտարարել է Գերմանիայի առողջապահության նախարար Կառլ Լաուտերբախը RND-ին տված հարցազրույցում, փոխանցոմ է «Իզվեստիա.ռու»-ն։

Գերմանիայի առողջապահության գերատեսչության ղեկավարը նշել է, որ ռուսական էներգառեսուրսների մատակարարման խափանումների պատճառով առաջացած խնդիրները կարող են հարվածի տակ դնել բոլոր սոցիալական օբյեկտները, այդ թվում՝ հիվանդանոցները:

Լաուտերբախը մտահոգություն է հայտնել այս իրավիճակի կապակցությամբ՝ զգուշացնելով կլինիկաների մոտալուտ սնանկացման իրական վտանգի մասին։

«Եթե մենք արագ և իսկապես արմատական չարձագանքենք, հիվանդանոցները կփակվեն»,- նշել է նա։

Ըստ Լաուտերբախի, սոցիալական ոլորտի ֆինանսավորման դեֆիցիտը 2022 և 2023 թվականներին կկազմի շուրջ 15 մլրդ եվրո: Այս պայմաններում, ինչպես նշել է նախարարը, պետությունը չի կարողանա աջակցել բոլոր ձեռնարկություններին ու կազմակերպություններին, որոնք դրա կարիքն ունեն։