Անի Լորակի, Աննա Սեդակովայի, Ռեգինա Տոդորենկոյի և Տաիսիա Պովալիի մուտքն Ուկրաինա արգելվել է

Ուկրաինայի նախագահ Վլադիմիր Զելենսկին պատժամիջոցներ է կիրառել ռուսաստանաբնակ երգչուհիներ Տաիսիա Պովալիի, Անի Լորակի, Աննա Սեդոկովայի և հեռուստահաղորդավարուհի Ռեգինա Տոդորենկոյի նկատմամբ։ Այս մասին գրում է «Իզվեստիա.ռու»-ն՝ հղում անելով համապատասխան հրամանագրին։

Վերոնշյալ անձինք ունեն Ուկրաինայի քաղաքացիություն, սակայն այժմ նրանք համարվում են հայրենիքի դավաճաններ, քանի որ ժամանակին մեկնել են Ռուսաստան և այնտեղ հաջող կարիերա են ստեղծել։ Այժմ նրանց մուտքը երկիր կարգելվի։ Բացի այդ, նրանց երգերը չեն հեռարձակվի հեռուստատեսությունով։

Փաստաթղթի համաձայն՝ պատժամիջոցներն արգելափակում են նրանց ակտիվները Ուկրաինայի տարածքում, սահմանափակում են առևտրային գործառնությունները և կանխում են կապիտալի դուրսբերումը Ուկրաինայի սահմաններից դուրս։ Պատժամիջոցները գործում են հինգ տարի ժամկետով։

Ավելի վաղ Ուկրաինայի նախագահը գործողության մեջ է դրել երկրի ազգային անվտանգության և պաշտպանության խորհրդի որոշումը ՌԴ ֆիզիկական և իրավաբանական անձանց դեմ պատժամիջոցների վերաբերյալ: Ցուցակում ընդգրկված է 1374 ընկերություն և կազմակերպություն, ինչպես նաև մոտ 2,5 հազար ֆիզիկական անձ: