Կխնդրեմ լրագրողներին մեզ փորձագետների հետ տետատետ թողնել, որպեսզի ինչ ուզեն՝ մեզ արխային ասեն. Բաբկեն Թունյան

«Մինչև մեկ ժամը մեր լրագորղները կարող են լուսաբանել քննարկումը, դրանից հետո կունենանք փակ քննարկում»,-ֆիզիկական անձանց եկամուտների համընդհանուր հայտարարագրման համակարգի ներդրում նախատեսող օրենսդրական նախաձեռնության վերաբերյալ հրավիրված աշխատանքային քննարկման մեկնարկին ԱԺ-ում հայտարարեց Տնտեսական հարցերի մշտական հանձնաժողովի նախագահ, ՔՊ-ական Բաբկեն Թունյանը:

Նա հավաստիացրեց, որ հրավիրված փորձագետներն էլ ավելի շատ հակված են, որ քննարկումը փակ լինի:

«Այդ առումով մենք կաշկանդվածություն չունենք, պատրաստ ենք ամենաքննադատական կարծիքները լսել, այնպես, որ երբ ժամանակը գա, կխնդրեմ լրագրողներին մեզ թողնել տետատետ, որպեսզի ինչ ուզեն՝ մեզ արխային ասեն»,-հայտարարեց Բաբկեն Թունյանը:

Օրենսդրական փոփոխությունները ներկայացրեց ֆինանսների փոխնախարար Արման Պողոսյանը՝ տեղեկացնելով, որ 2023 թվականից նախատեսվում է փուլային սցենարով Հայաստանում ներդնել ֆիզիկական անձանց եկամուտների համընդհանուր հայտարարագրման համակարգ:

Ըստ փոխնախարարի՝ նախատեսված է, որ հայտարարագրերը նախապատրաստելու է ՊԵԿ-ը՝ իր տրամադրության տակ եղած տեղեկատվության հիման վրա, որը հայտարարատուն կարող է խմբագրել, ճշգրտել, լրացնել և հաստատված ներկայացնել ՊԵԿ՝ որպես եկամտի հայտարարագիր:

«Առաջին փուլում հայտարարագիր ներկայացնողների թվում կլինեն նրանք, ովքեր արդեն այսօր ներկայացնում են այն»,-հայտնեց փոխնախարարը և բացատրեց, որ այնպիսի կարգավորում պետք է տրվի, որ պետական պաշտոնյանները և նրանց փոխկապակցված անձինք երկու անգամ հայտարարագիր չներկայացնեն և՛ Կոռուպցիայի կանխարգելման հանձնաժողով, և՛ ՊԵԿ, բայց դեռ որոշված չէ, թե որ մարմնին են ի վերջո ներկայացնելու:

Արման Պողոսյանի խոսքով՝ առաջին տարում հայտարարագիր կներկայացնեն նաև այն անձինք, որոնք կապ ունեն հայտարարագրվող տարում 1 մլրդ դրամ և ավելի շրջանառություն ունեցող ընկերության հետ, կամ 20 մլն և ավել դրամի փոխառություն են ստացել ռեզիդենտ առևտրային կազմակերպությունից, կամ համարվում են դրանց շահառուն:

Փոխնախարարի տեղեկացմամբ՝ հաջորդ տարի նրանց կմիացվեն այն անձինք, որոնք քաղաքացիաիրավական պայամանագրով աշխատանքներն են իրականցնում, բայց ներգրավված չեն առաջին խմբում և այն անձինք, որոնք աշխատանքային պայմանագրերով համարվում են վարձու աշխատողներ, իսկ երրորդ փուլում մնացած ռեզիդենտ ֆիզիկական անձինք, բայց նրանց թվից կարող են հանվել անչափահասները: