Մեջլիսում ընթերցել են Նախիջևանի 30 տարվա ղեկավարի անակնկալ հրաժարականի դիմումը

Նախիջևանի Ինքնավար Հանրապետության ղեկավար Վասիֆ Թալիբովը հրաժարական է տվել: Լուրը հայտնում է «Գազետա ռու»-ն հղում անելով ադրբեջանական ԶԼՄ-ներին:

Ըստ աղբյուրի՝ այդ որոշումը հրապարակվել է հանրապետության Մեջլիսի նիստում։ Թալիբովը չի նշել պատճառը։

Ադրբեջանական մեկ այլ լրատվամիջոցի փոխանցմամբ՝ Թալիբովը չէ, որ հայտարարել հրաժարական տալու մտադրության մասին։ Նրա հայտարարությունը ընթերցել է նրա առաջին տեղակալ Ազեր Զեյնալովը, որին, համաձայն երկրի Սահմանադրության, պետք է փոխանցվեն շրջանի ղեկավարի լիազորությունները։ Զեյնալովը 52 տարեկան է, 2005 թվականից երկրի Մեջլիսի պատգամավոր է։

Թալիբովը Նախիջևանի Ինքնավար Հանրապետության Գերագույն Մեջլիսի (ղեկավար) նախագահ է դարձել 1995 թվականին։ Նա այս պաշտոնը զբաղեցրել է գրեթե 30 տարի։