Սաակաշվիլին հրաժարվել է թունաբանական թեստավորումից՝ առանց արևմտյան բժիշկների մասնակցության

Վրաստանի նախկին նախագահ Միխեիլ Սաակաշվիլին, որն այժմ բուժում է անցնում Թբիլիսիի «Վիվամեդ» կլինիկայում, հրաժարվել է առանց արևմտյան փորձագետների մասնակցության իր մարմնում ծանր մետաղների առկայության թեստավորում անցնել։ Այս մասին լրագրողներին հայտնել է նրա փաստաբան Շալվա Խաչապուրիձեն, որի խոսքերը մեջբերել է «Ինտերֆաքս»-ը։

Իրավապաշտպանի խոսքով՝ լիովին անհասկանալի է, թե ինչ հիմքով է հատուկ քննչական ծառայության քննիչ Վասիլ Կակաշվիլին դեկտեմբերի 24-ին փորձել նմուշներ վերցնել քաղաքական գործչի մազերից ու եղունգներից։

Խաչապուրիձեն պարզաբանել է, որ Սաակաշվիլին համաձայնել է նոր հետազոտություն անցկացնել Վրաստանի օրենսդրությանը լիովին համապատասխան և միայն ամերիկացի կամ եվրոպացի բժիշկների մասնակցությամբ։ Փաստաբանն ասել է, որ Վրաստանի նախկին նախագահը չի վստահում «Վիվամեդ» կլինիկայի և քրեակատարողական ծառայության բժիշկներին, որոնք վերջերս հայտարարեցին, որ քաղաքական գործիչը մարմնի թունավորում չունի ծանր մետաղներով, և նրա օրգանիզմում այդ ցուցանիշները նորմայից ցածր են։

Անցած հինգշաբթի՝ դեկտեմբերի 22-ին, Սահակաշվիլին վատառողջ լինելու պատճառով չի կարողացել տեսակապով մասնակցել իր գործով դատական նիստին կլինիկայից ։

Մինչ այդ Վրաստանի արդարադատության նախարարության հատուկ քրեակատարողական ծառայության բժշկական բաժնի ղեկավար Մալխազ Ուրթքմելիձեն հայտնել էր, որ Սահակաշվիլիի մարմնի թունաբանական ուսումնասիրությունը ցույց է տվել, որ նրա օրգանիզմում նորմը գերազանցող թունավոր նյութեր չկան։