Իտալիայի ափերի մոտ միգրանտներ տեղափոխող նավ է խորտակվել. զոհերի թվում կան բազմաթիվ երեխաներ

Իտալիայում Կալաբրիայի ափերի մոտ որոնումներ են ընթանում միգրանտներին տեղափոխող մոտորանավակի խորտակման հետևանքով զոհերի մարմինները հայտնաբերելու ուղղությամբ, գրում է «Euronews»-ը։

Ափը հսկում են իտալական ոստիկանության ուժեղացված ջոկատները։

Տարբեր հաշվարկներով՝ նավում եղել է 150-ից 250 ուղևոր։ Որոնողական աշխատանքների առաջին օրը փրկվել է 80 մարդ։ Հաստատվել է 59 մարդու մահը, որոնց թվում կան բազմաթիվ երեխաներ։ Կարմիր խաչի ներկայացուցիչների խոսքով՝ ափին մահացած են գտել ընտանիքների։

Գերբեռնված փայտե նավը փոթորկի ժամանակ բախվել է Իտալիայի ափերի մոտ գտնվող ժայռերին։ Պաշտոնական տվյալների համաձայն՝ այն Թուրքիայից անօրինական միգրանտների էր տեղափոխում։ Ոստիկանությունից հայտնել են, որ մարդկանց թրաֆիքինգի գործով ձերբակալվել է փրկվածներից մեկը, որին ճանաչել են որպես նավարկության կազմակերպիչ։

Իրավապաշտպանների գնահատականներով ՝ 2014 թվականից Միջերկրական ծովում Եվրոպա հասնելու փորձի ժամանակ զոհվել կամ անհետ կորել է ավելի քան 20 հազար միգրանտ։