Մեքսիկայում առնվազն 35 մարդ է զոհվել միգրացիոն կենտրոնում բռնկված հրդեհի հետևանքով

Առնվազն 35 միգրանտ է զոհվել, մոտ 100-ը՝ վիրավորվել ԱՄՆ-ի հետ սահմանին գտնվող Մեքսիկայի Սյուդադ Խուարես քաղաքի ներգաղթյալների կենտրոնում բռնկված հրդեհի հետևանքով: Միջադեպի մասին Excelsior թերթի տարածած լուրին անդրադարձել է «ՌԻԱ նովոստի»-ն։

«Առնվազն 35 միգրանտ է զոհվել Սյուդադ Խուարեսի Միգրացիայի ազգային ինստիտուտի (INM) կենտրոնում բռնկված հրդեհի հետևանքով: Մոտ 100-ը թունավորվել է շմոլ գազից, ոմանց վիճակը ծայրահեղ ծանր է»,-ասվում է հաղորդագրության մեջ։

Heraldo թերթի փոխանցմամբ՝ հրդեհը բռնկվել է միգրանտների կալանավայրում, որոնք փորձել են անօրինական կերպով հատել ԱՄՆ սահմանը։ Ինչպես գրում է Excelsior թերթը, կենտրոնը հրդեհել են հենց միգրանտները, ովքեր փորձել են դրա օգնությամբ փախչել։