«Հրապարակ». Սա վերջին անգամ է, որ քննիչ հանձնաժողովի գործունեության ժամկետը երկարաձգվում է` այլևս նման իրավունք չի լինի

«Հրապարակ» թերթը գրում է.

«ԱԺ պաշտպանության հանձնաժողովի ՔՊ-ական նախագահ Անդրանիկ Քոչարյանը, որ «2020 թ․ սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով» ստեղծված քննիչ հանձնաժողովի նախագահն է, առաջարկում է մեկ անգամ ևս 6 ամսով երկարաձգել հանձնաժողովի գործունեության ժամկետը և նման նախագիծ է դրել շրջանառության մեջ։

«ԱԺ քննիչ հանձնաժողովը տարբեր գերատեսչություններից պահանջել և ստացել է բազմաքանակ փաստաթղթեր, որոնք մանրամասն ուսումնասիրելուց հետո անցել է հրավիրյալներին լսելու փուլին»,- նշված է հիմնավորման մեջ։

Հիշեցնենք, որ անցած տարվա փետրվարի սկզբներին ձևավորված հանձնաժողովի գործունեության ժամկետը մեկ անգամ երկարաձգվել է հոկտեմբերին։ Քննիչ հանձնաժողովի լիազորությունների ժամկետը, ԱԺ կանոնակարգ-օրենքի համաձայն, 6 ամիս է, որը կարող է 2 անգամ, հանձնաժողովի առաջարկությամբ՝ ԱԺ որոշմամբ երկարաձգվել, մինչև վեցական ամսով: Այսինքն, սա վերջին անգամ է, որ ժամկետը երկարաձգվում է` այլևս նման իրավունք չի լինի»։

Մանրամասները թերթի այսօրվա համարում