Ռուսներին նախազգուշացրել են կարմրուկի համաճարակի վտանգի մասին

Այս տարվա սկզբից Ռուսաստանում գրանցվել է կարմրուկի 749 դեպք։ Այս մասին հայտնել է բժիշկ Ալեքսանդր Մյասնիկովը։ Նա զգուշացրել է այս հիվանդության վարակիչ լինելու մասին։

«Սա բոլոր հայտնի վիրուսներից ամենավարակիչն է։ Միակ խորհուրդը պատվաստվելն է»,- նշել է բժիշկը՝  ավելացնելով, որ ցանկացած պահի կարող է համաճարակ սկսվել։

Ավելի վաղ բժիշկ Անտոն Երշովը նախազգուշացրել էր կարմրուկի գլոբալ հնարավոր համաճարակի մասին՝ նշելով, որ հիվանդությունը «կհայտնվի ամենուր»։

Pravda.ru-ի փոխանցմամբ,  այս հիվանդության տարածման վտանգն առաջացել է «հակապատվաստումային» քարոզչության պատճառով, ինչը հանգեցրել է չպատվաստվածների թվի ավելացմանը։

Նշենք, որ այս տարի կարմրուկի դեպքեր գրանցվել են նաև Հայաստանում։ ԱՆ-ն վերջին անգամ  հիվանադացության մասին տվյալներ հրապարակել է մարտի 29-ին՝ երկու շաբաթ առաջ, ըստ որի կարմրուկի հիվանդացության 85 դեպք է գրանցվել, որից 7-ը հսոպիտալացված է։ Դեպքերից 57-ը երեխաներ են, 28-ը` մեծահասակներ:

Panorama.am-ի հարցման ի պատասխան ԱՆ-ից երեկ հրաժարվեցին նոր տվյալներ տրամադրել։