«Ֆարյատևի երևակայությունները». առաջնախաղ՝ Ռուսական թատրոնի Փոքր բեմում

Կ. Ստանիսլավսկու անվան ռուսական դրամատիկական թատրոնի Փոքր բեմի խաղացանկը կհամալրի ժամանակակից դրամատուրգ Ալլա Սոկոլովայի «Ֆարյատևի երևակայությունները» պիեսը՝ Օլեգ Գալիցկու ռեժիսուրայով։ Այս մասին Panorama.am-ին հայտնեցին Ռուսական դրամատիկական թատրոնի մամուլի ծառայությունից։ 

Ա.Սոկոլովայի «Ֆարյատևի երևակայությունները» պիեսը սիրո, մենության, հանդիպումների և բաժանումների, երևակայությունների և իրականության մասին է։

Պիեսի գլխավոր հերոսը՝ Պավել Ֆարյատևը, նույն փոքրիկ մարդն է, որին ճանաչում ենք Գոգոլի, Չեխովի, Դոստոևսկու և այլ ռուս գրողների ստեղծագործություններից։ Նա ապրում է իր երազներում,  իրականությունը վախեցնում է նրան։

Ներկայացման հերոսները երազում են սիրել ու երջանիկ լինել, բայց կարո՞ղ է իրականանալ նրանց երազանքը, որն անիրագործելի է թվում։ Իհարկե, գուցե մի օր ամեն ինչ լավ լինի, բայց ոչ հիմա։ Ոչ իրենց իրականության մեջ։

Ներկայացման դերակատարներն են Սերգեյ Գրիգորյանը, Լալիտա Բուկիան, Լիանա Սևումյանը, Հայարփի Զուռնաչյանը, Նատալի Հարությունովան, Յանա Թուրգունյանը:  

Ներկայացման բեմանկաչությունը՝ Լեոնիդ Շուլյակովի, Յարոսլավ Լոզայի, զգեստները՝ Մարի Սարգսյանի, երաժշտական ձևավորումը՝ Օլեգ Գալիցկու:

Ներկայացումը նախատեսված է 14+ անձանց համար:

Առաջնախաղերը կկայանան մայիսի 2-ին, 3-ին և 5-ին: