Չոր մաշկի և կրունկների ճաքերի պատճառները՝ ըստ մաշկաբան-պոդոլոգի

Ամռանը, երբ շատերն անցնում են բաց կոշիկների, առավել անհանգստացնող խնդիր են դառնում ոտնաթաթերի՝ հիմնականում կրունկների չորությունն ու ճաքերը։ Նույնիսկ եթե դրանք չեն առաջացնում անհանգստություն կամ ցավ, չպետք է անտեսել, քանի որ ճաքերը կարող են լինել օրգանիզմի տարբեր խնդիրների ազդանշաններ։

Panorama.am-ը խնդրի շուրջ զրուցել է մաշկաբան-պոդոլոգ Սյուզաննա Գևորգյանի հետ՝ պարզելու մաշկի չորության ու ճաքերի առաջացման հիմնական պատճառները։

Panorama.am-Արտաքին ո՞ր ազդակներն են ձևավորում նման խնդիր։
Մաշկաբան-պոդոլոգ- Խնդիրը բազմապատճառային է, կարող է պայմանավորված լինել ինչպես արտաքին, այնպես էլ ներքին ազդակներով։

Նեղ ու անհարմար, սխալ ընտրված կոշիկները առնվազն խախտում են արյան շրջանառությունը և քաշի ներդաշնակ բաշխումը։ Հետևանքները կոշտուկներն ու ճաքերն են։ Բաց կոշիկները ևս կարող են լինել պատճառ, քանի որ ամռանը կրունկների մաշկը  արագ կոպտանում և խտանում է։

Panorama.am-Խնդրի առկայության դեպքում պե՞տք է հաճախ շերտազատել մաշկը։
Մաշկաբան-պոդոլոգ-Չափազանց ակտիվ խնամքը ևս կարող է հակառակ ազդեցությունն ունենալ։ Շերտազատող սարքերի ինքնուրույն օգտագործումը չափազանց բարակեցնում է մաշկը: Այստեղից էլ վերքերն ու ճաքերը։ Բացի այդ, չափազանց շատ մաշկ հեռացնելով, դուք խթանում եք հյուսվածքների վերականգնմանը, մաշկը սկսում է արագ և ավելի մեծ ծավալով աճել ու կոպտանալ:

Panorama.am-Առողջական ինչպիսի՞ խնդիրներ կարող են դառնալ խնդրի առաջացման պատճառ։
Մաշկաբան-պոդոլոգ-Եթե պացիենտը բախվել է չոր կրունկների և ոչ բնորոշ ճաքերի խնդրին, ապա դրա պատճառը կարող է լինել ավելի լուրջ, քան ոչ պատշաճ խնամքը կամ անհարմար կոշիկները, օրինակ՝ սնկային հիվանդություններն ու վարակները։ Այս դեպքում պետք է անհապաղ դիմել համապատասխան բժշկի օգնությանը։ Այլ պատճառներից են՝ ավիտամինոզը, մարմնի ջրազրկումը, մարսողական տրակտի խանգարումները, հորմոնալ վերակազմավորումը և այլն։

Panorama.am-Ինչպե՞ս խնամել ոտքերի մաշկն ու կանխարգելել նման խնդրի առաջացումը։
Մաշկաբան-պոդոլոգ-Ոտքերի դեպքում հիգիենայի տարրական կանոնների անտեսումը հղի է տհաճ հետևանքներով, սակայն խնամքը հատուկ ջանքեր չի պահանջվում։
Չորացրեք ոտքերը սրբիչով, հատուկ ուշադրություն դարձնելով մատների միջև ընկած հատվածին:
Կարևոր են նաև խոնավացնումն ու սնուցումը՝ չոր կրունկների խնդիրը լուծելու հարցում։ Ցանկալի է կիրառել այն ամեն երեկո՝ որպես գիշերային խնամքի մաս։