Կրեմլը վտանգավոր քայլ է անվանել G7-ի կողմից Ուկրաինային անվտանգության երաշխիքներ տալը

Ուկրաինային անվտանգության ցանկացած երաշխիք տրամադրելը չափազանց սխալ է և շատ վտանգավոր: Այդ մասին հայտարարել է ՌԴ նախագահի խոսնակ Դմիտրի Պեսկովը, որի խոսքերը մեջբերել է «ՌԻԱ նովոստի»-ն։

«Ուկրաինային անվտանգության երաշխիքներ տրամադրելով՝ այդ երկրներն իրականում անտեսում են անվտանգության անբաժանելիության միջազգային սկզբունքը, այսինքն՝ Ուկրաինային անվտանգության երաշխիքներ տրամադրելով՝ ոտնձգություն են անում Ռուսաստանի Դաշնության անվտանգության դեմ»,-լրագրողներին ասել է Կրեմլի խոսնակը։

Նրա խոսքով, սա հղի է «շատ, շատ բացասական հետեւանքներով» ցանկացած պլանավորման հորիզոնում։

Ինչպես այսօր Վիլնյուսում ՆԱՏՕ-ի գագաթնաժողովում ասել է Սպիտակ տան Ազգային անվտանգության խորհրդի Եվրոպայի գծով ավագ տնօրեն Ամանդա Սլոութը, G7 երկրների առաջնորդները կհայտարարեն Ուկրաինայի անվտանգությունն ապահովելու երկարաժամկետ պարտավորությունների մասին:

Ինչպես հաղորդում է Sky News հեռուստաալիքը, փաստաթուղթը նախատեսում է Կիևին զինտեխնիկայի հատկացում, հետախուզության փոխանակման ուժեղացում, Ուկրաինայի զինված ուժերի ուսումնական ծրագրերի ընդլայնում, ինչպես նաև արդյունաբերական օբյեկտների զարգացում։