Հասկանալի է՝ չնախատեսված վթար է, բայց դրա մասին պետք է նախօրոք մտածել. Քաղաքացիներն՝ անջուր մնալու մասին

«Արզնի 1» ջրատարի վթարի հետևանքով ջրից զրկված բնակիչները մի կերպ են դիմանում ամռան տապին։

«Խանութներից առնում ենք ջուրը, օգտագործում ենք»,-ասում է մի տղամարդ։
«Շատ դժվար է, փոքր երեխա կա տանը, հնարավոր չէ... Ինչ անում ենք, ջուր է պետք»,-ասում է հարցմանը մասնակցած կինը։

Մյուսներն ըմբռնումով են մոտենում՝ ասում են, վթար է եղել, շուտով կտան։

Պատասխանելով այն հարցին, թե ինչպե՞ս են գնահատում «Վեոլիա ջուր» ընկերության աշխատանքը, հարցվողներից մեկը նկատեց.
«Շատ վատ, քանի որ կյանքի ողջ ռիթմը կանգ է առնում։ Հասկանալի է՝ չնախատեսված վթար է, բայց դրա մասին պետք է նախօրոք մտածել»։

Մի տղամարդ էլ հորդորեց տնտեսել ջուրն ու փական դնել ցայտաղբյուրների վրա։