Ադրբեջանից հույս են հայտնել, որ մինչև տարեվերջ Հայաստանի հետ խաղաղության պայմանագիր կկնքեն

Ադրբեջանը դեռևս հույս ունի մինչև տարեվերջ Հայաստանի հետ խաղաղության պայմանագիր կնքել։ Այդ մասին ՏԱՍՍ-ին տված հարցազրույցում հայտարարել է Ադրբեջանի նախագահի օգնական Հիքմեթ Հաջիևը։

«Մենք դեռ հույս ունենք, որ խաղաղ պայմանագիր կստորագրվի մինչև այս տարվա վերջ և կոչ ենք անում Հայաստանի քաղաքական ղեկավարությանը կատարել հիմնական քայլը՝ պաշտոնապես, խաղաղության պայմանագրի տակ իրենց ստորագրությամբ, արձանագրել Ադրբեջանի տարածքային ամբողջականության ճանաչումը»,-ասել է նա՝ պնդելով, թե արցախահայության հարցերն իրենց ներքին գործն է և Հայաստանը չպետք է խառնվի դրանց։

Հաջիևը նաև անջատողականության ֆինանսավորում է որակել Արցախի Հանրապետության սոցիալ-տնտեսական խնդիրները լուծելու համար Հյաստանից միջպետական վարկերի հատկացումը:

Հիշեցնենք, որ 2020թ.-ին սանձազերծած 44-օրյա ագրեսիայի հետևանքով օկուպացվեցին Արցախի Հանրապետության նոր տարածքներ, 40  հազարից ավել արցախցիներ բռնագաղթեցին իրենց հազարամյա բնօրրանից, արդյունքում՝ արցախյան հիմնահարցը, որն ազգերի ինքնորոշման հարթությունում է, ոչ թե լուծվեց, այլ ավելի խորացվեց: Ադրբեջանն արդեն 10 ամիս է լիակատար բլոկադայի մեջ է պահում Արցախը՝ տեղի բնակչությանը կանգնեցնելով աղետի առաջ: