Աշոտյանին դիմավորեցին ծափահարություններով

ՀՀԿ փոխնախագահ Արմեն Աշոտյանին Հակակոռուպցիոն դատարանի նիստերի դահլիճում գտնվողները դիմավորեցին ծափահարություններով ու բացականչություններով։

Աշոտյանի փաստաբան Ռուբեն Մելիքյանը,  վկայակոչելով Քրեական դատավարության 66-րդ հոդվածի 1-ին մասի 3-րդ կետով նախատեսված հիմքը,  ինքնաբացարկ հայտնեց դատավորին։

«Սույն գործով նախորդ երկու նիստերի ընթացքում ի հայտ են եկել հանգամանքներ, որոնք ողջամիտ կասկած են հարուցում նախագահող դատավորի անկողմնակալության մեջ»,-ասաց նա։

Մելիքյանի խոսքով, ինքն այս ընթացքում խոսել է անկողմնակալ շատ դիտորդների հետ,երկորդ կարծիք չի լսել, որ դատավորն անկողմնակալ է։

«Այս հիմքերով բացարկ ենք հայտնում։ Երկու նիստերը ցույց տվեցին, որ  վստահության պաշարը սպառված է»,-ասաց նա ու գրավոր միջնորդությունը փոխանցեց դատավորին։