Իրական սեփականատերը հայտնի է, բայց ես չեմ ասի հիմա, թե ով է. Ռոբերտ Խաչատրյանը՝ «ՄՏՍ Հայաստանի» վաճառքի մասին

«Հայտը նայվել է, ներկայացված տեղեկատվությունը գործընկերների հետ ևս մեկ անգամ ստուգվել է և արդյունքում հավանություն է տրվել վաճառքին»,-կառավարությն դիմաց տված ճեպազրույցում հայտնեց բարձր տեխնոլոգիական արդյունաբերության նախարար Ռոբերտ Խաչատրյանը՝ պատասխանելով հարցին, թե իր ղեկավարած նախարարությունը և ԱԱԾ-ն պետական շահի տեսանկյունից վտանգավոր տարրեր չե՞ն տեսել, երբ հավանություն են տվել «ՄՏՍ Հայաստանի» 100% բաժնեմասի վաճառքի գործարքին:

Հարցին, թե ազգային անվտանգության տեսանկյունից վտանգ չա, որ շուրջ երկու միլիոն բաժանորդ ունեցող կապը վաճառքի է հանվում՝ նախարարը պատասխան հարցը հնչեցրեց. «Դուք այդտեղ տեսնո՞ւմ եք ազգային անվտանգության սպառնալիք»:

Խաչատրյանը չցանկացավ հրապարակել, թե բաժնետոմսերը գնած «Ֆեդիլքո Գրուպ Լիմիրիդ» ընկերության իրական սեփականատերը ով է՝սկզբից հայտնելով, որ չի հիշում անունը, հետո այլ պատասխան տվեց:

«Իրական սեփականատերը հայտնի է, բայց ես չեմ ասի հիմա, թե ով է»,-ասաց ԲՏԱ նախարարը:

Նա չարձագանքեց նաև հարցին, ըստ որի X-Բեթ բուքմեյքերական ընկերությունն է փորձում մտնել շուկա և լուր կա, որ այն ցանկանում է անել շուրջ երկու միլիոն բաժանորդ ունեցող ընկերության գնման գործարքի միջոցով:

Ռոբերտ Խաչատրյանը չպատասխանեց լրագրողների մյուս հարցերին և հեռանալով հորդորեց գրավոր դիմել նախարարությանը: