«Ձեր քաղաքականության հետևանքը մեր ժողովրդի ողբերգությունն է»․ Տիգրան Աբրահամյան

Հայաստանում ապրող յուրաքանչյուր մարդու համար առաջնահերթություն են անվտանգային հարցերը, մարդկանց, երկրի անվտանգությունը, սահմանների անձեռնմխելիությունը, ինքնիշխանությունը, որն այս կառավարությունը 5-5,5 տարիների ընթացքում պարզապես չի ապահովել։ Այս մասին խորհրդարանական ճեպազրույցների ժամանակ ասաց «Պատիվ ունեմ» խմբակցության քարտուղար Տիգրան Աբրահամյանը։

Անդրադառնալով պետական բյուջեի քննարկմանը՝ պատգամավորը նշեց, որ ամեն տարի երբ տեղի է ունենում բյուջեի քննարկում, ինքը միշտ փորձում է հիշել՝ անցնող տարվա ընթացքում ինչ իրադարձություններ են տեղի ունեցել Հայաստանում և Արցախում, քանի որ ցանկացած կառավարության առաջնահերթ խնդիրներից մեկն իր երկրի տարածքային ամբողջականության ապահովումն է, իր երկրի քաղաքացիների անվտանգության ապահովումը, դեռ չի խոսում երկրի հեղինակության, անհրաժեշտ դիրքավորման և մնացած այլ գործոնների մասին։ 

«Հիմա ինչ արժեք ունի խոսել այս կամ այն ոլորտներում բյուջետային ավելացումների մասին, երբ յուրաքանչյուր տարվա հետ միջին վիճակագրական քաղաքացին իր համար, իր երկրի համար արձանագրում է մարդկային մեծաթիվ կորուստներ, հայրենիքի կորուստ։ Այսինքն ՝ամեն տարի կառավարության ներկայացուցիչը խոսում է, թե այս կամ այն ուղղությամբ այսքան բյուջետային հատկացումներ են կատարելու, իսկ հաջորդ տարի ասում` գիտեք, մենք կորցրեցինք ՀՀ-ից այսքան տարածք, այսքան կորուստներ ունեցանք հերթական ագրեսիայի ժամանակ, մենք հանձնեցինք Արցախը կամ Ադրբեջանը վերահսկողություն հաստատեց Արցախի նկատմամբ և այլն»,- ասաց Տիգրան Աբրահամյանը։

Նրա խոսքով՝ սա վերաբերում է նաև այն ժամանակահատվածին, երբ 44-օրյա պատերազմից հետո իրենք խոսում էին քաղաքական և անվտանգային խնդիրների մասին, իսկ իշխանությունն ասում էր, թե մեծացրել են սոցիալական հատկացումները։

«Հիմա մենք չենք կարողանում այդ մարդկանց հասկացնել, որ ստեղծել են խնդիրներ, ձեր քաղաքականության հետևանքը մեր ժողովրդի ողբերգությունն է, և հիմա եկել ու խոսում եք նրա մասին, որ ինչ-որ մարդիկ կարողացել են դուրս գալ և չմահանալ ու դուք նրանց սոցիալական խնդիրներն եք լուծում»,- ասաց Տիգրան Աբրահամյանը։