Նույն բեռներով բեռնված բեռնատարների մի մասն անցնում է Լարսով, մյուս մասը` ոչ. Գնել Սանոսյան

«Խնդիրը կա, և, այո, կան նույն բեռներով բեռնված բեռնատարներ, որոնց մի մասն անցնում է, մյուս մասը` ոչ։ Գործընկերները որոշակի բեռի ուսումնասիրություն են անում  և որոշակի խնդիրներ են տեսնում»,- լրագրողների հետ զրույցում ասաց ՀՀ տարածքային կառավարման և ենթակառուցվածքների նախարար Գնել Սանոսյանը՝ պատասխանելով հարցին, որ Լարսում կուտակումներ կան,  արտահանողները բարձրաձայնում են, որ քաղաքական նպատակներով ռուսական կողմը թույլ չի տալիս բեռները,  որոնք պետք է ֆիտոսանիտարական  ստուգում անցնեն, հատեն ռուսական սահմանը, մոտ  60 բեռնատար հետ է եկել։

Հարցին՝ արդյոք խնդիրը քաղաքական դրդապատճառ ունի, օրինակ ՀԱՊԿ նիստերին չմասնակցելը, Նիկոլ Փաշինյանի հակառուսական հայտարարությունները, նախարարը պատասխանեց. «Սահմանի վրա տեսչական մարմինը տվյալ ապրանքների հետ կապված որոշակի մասնագիտական խնդիրներ է տեսել, Հայաստանի համապատասխան մարմիններն էլ աշխատում են այդ գործընկերների և տնտեսվարողների հետ»։