ՀՀ ԱԳՆ-ն արձագանքել է Հայաստանի և Ադրբեջանի ԱԳ նախարարների հանդիպման մասին Մարուքյանի հայտարարությանը

ՀՀ ԱԳՆ-ից հայտնում են, որ  Հայաստանի և Ադրբեջանի ԱԳ նախարարների հանդիպման պայմանավորվածություն չկա:

Այդ մասին հայտնեց Արտգործնախարարության խոսնակ Անի Բադալյանը՝ պատասխանելով «Ազատության» հարցին, թե արդյոք եղե՞լ է Վաշինգտոնում նախարարների հանդիպման կոնկրետ պայմանավորվածություն ու հիմա Ադրբեջանը հրաժարվո՞ւմ է:

«Եթե լինում է հանդիպման պայմանավորվածություն, մենք տեղեկացնում ենք»,-ասել է Բադալյանը:

Ավելի վաղ, հատուկ հանձնարարություններով դեսպան Էդմոն Մարուքյանն էր հայտարարել՝ հունվար ամսին Ադրբեջանն ընդունել է Միացյալ Նահանգների հրավերն՝ այնտեղ արտգործնախարարների մակարդակով հանդիպման: Ադրբեջանի ԱԳՆ խոսնակ Այխան Հաջիզադենն էլ պնդել էր, թե որևէ համաձայնություն արտգործնախարարների առաջիկա հանդիպման վայրի ու ամսաթվի վերաբերյալ չկա։