Իսրայելցի գերիների հարազատները ներխուժել են խորհրդարան

Իսրայելցի պատանդների հարազատները ներխուժել են Քնեսեթի ֆինանսական հարցերով հանձնաժողովի նիստի դահլիճ՝ պատգամավորներից պահանջելով միջոցներ ձեռնարկել իսրայելցիներին Համասի գերությունից ազատելու համար։

The times of Israel-ի փոխանցմամբ, առևանգվածների լուսանկարներով մարդիկ ներխուժել են խորհրդարանի դահլիճ, որտեղ այդ պահին քննարկվում էին Իսրայելի բանկի և բյուջեի հետ կապված հարցեր։

Խորհրդարան ներխուժած հարազատները բղավել են. «Չեք նստելու այստեղ, քանի դեռ նրանք այնտեղ մահանում են»։

Խորհրդարանականները կանչել են անվտանգության ծառայության աշխատակիցներին, լսել են առևանգվածների հարազատների պահանջները։ Նրանք, ի թիվս այլ բաների, առաջարկել են փրկագին տալ։

Քնեսեթի հանձնաժողովի ղեկավար Գաֆնին խոստացել է ընտանիքների մտահոգությունները փոխանցել վարչապետ Բենիամին Նեթանյահուին և հավելել, որ ինքը «ամեն ինչ կանի»՝ օգնելու նրանց երեխաների, եղբայրների և կանանց վերադարձին։